40 ёшда ҳаёт энди бошланади...

Ҳечдан кўра кеч бўлса ҳам янгитдан ҳаёт бошлашга ҳаракат қилинг

“Ҳеч ким сизга ўзингизчалик ғамхўрлик қилолмайди”, дейди “Gazeta.ru” нашри ва ҳечдан кўра кеч бўлса ҳам янги ҳаётга қадам қўйиш сирлари билан ўртоқлашади, дейилади "Даракчи" нашрида.

Бизга баъзида илҳом, баъзида эса дангасаликни енгиш керак бўлади. Олдимизга қўйган вазифаларни бажарганимиз учун ўзимизни-ўзимиз тақдирлаб туришимиз лозим. Сизни ҳар доим кимдир “Сен зўрсан!”, “Буни бажара оласан!” деб ишонтириб туриши шарт эмас. Барча қўрқувларни, ишончсизликларни енгиб, мустақил равишда бирор ютуққа эришишга ҳаракат қилинг. Ҳеч қачон вақт ўтди, энди кеч бўлди деб ўйламанг.

Ёшингизни тўғри қабул қилинг

“Эрталаб тонгда ёш, чиройли, куч-қувватга тўлган, барча ташвишларни, бегоналарнинг фикрини унутган ҳолда уйғонишни ким истамайди дейсиз? Ўрта ёшли инсонлар учун бу гаплар ушалмас орзудай туюлади, – дейди Гарвард ва Нью-Йорк университети ўқитувчиси, “Ҳечдан кўра, кеч” китоби муаллифи Барбара Шер.– Аммо сизни келажакда катта ўзгаришлар кутмоқда. Сиз янги ҳаёт остонасида турибсиз. Бу ҳаётингизнинг илгариги 40 йиллик умрингиздан тубдан фарқ қилади ва уни ишонч билан иккинчи ҳаёт деб аташ мумкин. Бу ҳаёт илгариги ҳаётингиздан тубдан фарқ қилади”.

Унинг фикрини америкалик психиатр Морган Скотт Пек ҳам тасдиқлайди. Унинг айтишича, кўпчилик бу ёшдаги кризисни ўтказишга тайёр бўлмайди. Улар фақат ўтмиш хотиралари билан яшашга ўрганиб қолишади.

Олға интилишга ҳаракат қилинг

Вақтни тўхтатиш ҳақидаги фикрингиздан воз кечинг. Баъзи бировлар ташқи қиёфасини ёшартиришга уриниб, 40 ёшида 20 ёшлидай кўринишга ҳаракат қилади. Аммо бу билан вақтни тўхтатиб бўлмайди. Янгича яшашга, бирор қизиқарли машғулот билан шуғулланишга ҳаракат қилинг. Қўрқувни унутинг, агар олға ҳаракат қилмасангиз, пайти келиб бунга ҳам афсусланасиз.

Янги одатларни шакллантиринг

1. Гаплашишга иккиланаётган одамингизга қўнғироқ қилинг.
2. Ўйлаганингиздан кўра эртароқ туришга ҳаракат қилинг.
3. Кўпроқ ҳадя қилинг, эвазига ҳеч нима кутманг.
4. Бошқалардан меҳрибончилик кутмасдан, уларга ғамхўрлик қилинг.
5. Ярадор бўлиб, қонга ботсангиз ҳам курашдан тўхтаманг.
6. Эҳтиёт бўлиш тавсия этилганда ҳам, таваккал қилишдан қўрқманг.
7. Орқангиздан ҳали ҳеч ким эргашмаган бўлса ҳам, етакчиликни қўлдан берманг.
8. Ўзингизга кўпроқ эътибор беринг, буни бошқалардан кутманг.
9. Саволларингизга жавоб тополмаганда ахмоқ бўлиб кўринишдан қўрқманг.
10. Баъзи бир майда-чуйда тафсилотларга дарров қўл силташга шошилманг, уларга диққат-эътиборли бўлинг.
11. Баҳонаи-сабаб кўп бўлса ҳам, ҳар қандай ишни охирига етказиб, бирор натижага эришишга ҳаракат қилинг.
12. Бошқаларнинг фикрига қўшилсангиз ҳам, шахсий фикрингиз бўлсин.
13. Хато қилишдан қўрқманг.
14. Хато қилсангиз, то кутилмаган натижага эришмагунча, тўхтаманг.
15. Нафасингиз тиқилиб қолса ҳам югуришдан тўхтаманг.
16. Сизга ёмонлик қилган одамдан ҳам меҳрингизни, яхшилигингизни аяманг.
17. Бажаришнинг имкони йўқдай туюлган ишларни бажаришга қўл уришдан қўрқманг.
18. Ишларингиз юришмаган пайтда ҳам ҳаракатларингиз учун жавоб беринг.
19. Олдингизда учраган тўсиқларга қарамай, олға интилинг. Ҳеч қачон қийналдим, деб ортга қайтманг!