2023 йил 1 январгача Тошкент автовокзалида йўл ҳақи чипталари чегирма нархда сотилади. “Водий” автотураргоҳи ҳайдовчилари учун бир марталик патта тўлови арзонлашди, “Воҳа” автотураргоҳида эса бу тўлов бекор қилинди.
ИИВнинг хабар қилишича, кейинги йилнинг 1 январига қадар Тошкент автовокзалида йўл ҳақи чипталари 5-10 минг сўмгача чегирма нархларда сотилади, автобуслар сони кўпайтирилади.
“Қурилиш автотех таъминот” унитар корхонасига қарашли “Бобуршоҳ” автотураргоҳида жойлашган “Водий” автотураргоҳидаги ҳайдовчилар учун бир марталик патта тўлови 15 минг сўмдан 10 минг сўмга туширилди.
Шу билан бирга, “Олмазор” метро станцияси ва “Тошкент” автовокзали атрофида жойлашган “Воҳа” автотураргоҳидан Самарқанд, Бухоро, Навоий ва Жиззах вилоятларига қатновчи автотранспорт воситалари учун олинадиган 2 минг 500 сўмлик патта тўлови бекор қилинди.
Ўрганишларга кўра, ҳозирда Тошкент шаҳар – Фарғона водийси йўналишидаги автомобил қатнови нархлари ўртача 150 минг сўмни ташкил қилмоқда. Бу эски нарх (100-110 минг сўм)дан 30-40 минг сўмга ошганини кўрсатяпти.
Пойтахтдан воҳа вилоятлари (9 та ҳудуд)га қатнайдиган автомобилларнинг йўл ҳақи эса ўртача 35-45 фоизгача қимматлашди. Хусусан, Гулистонга 40 минг сўм (эски нарх – 20 минг сўм), Самарқандга 150 минг сўм (эски – 80 минг сўм), Нукусга 450 минг сўм (эски – 300 минг сўм) сўрашмоқда.
Вазирликка кўра, махсус ишчи гуруҳи ҳайдовчилар билан нархларни сунъий равишда оширмаслик борасида профилактик суҳбат ўтказган. Бундай ҳолатларни аниқлаш ва олдини олиш мақсадида Ўзбекистондаги барча йўловчи ташиш автовокзаллари, автостанциялар ва сунъий ташкил қилинган автотураргоҳларга ички ишлар органларининг раҳбар ходимлари масъул этиб бириктирилган, уларнинг навбатчилиги ташкил этилган.
Маълумот учун, бу йил таътил даврида Тошкент шаҳридаги ОТМда таҳсил олаётган жами 185 минг 800 нафар талабанинг 93 мингга яқини ўзининг доимий яшаш жойига қайтиши кутилмоқда.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
