Самарқандда ДХХ вилоят бошқармаси ҳамда вилоят ИИБ ходимлари билан ҳамкорликда ўтказилган тезкор тадбирларда пора олаётган бир неча шахс ашёвий далиллар билан ушланган.
Жумладан, СамДУ математика факултети тютори, 48 ёшли Т.А. вилоят Бюджетдан ташқари пенсия жамғармасининг мансабдор шахслари билан жиноий тил бириктириб, маҳаллий фуқароларнинг меҳнат фаолиятларига 20 йиллик иш стажи қўшиб, нафақага чиқариб бериш эвазига 3 000 доллар олаётган вақтда қўлга олинди.
Жиззах вилояти Ғаллаорол туманида яшовчи, 29 ёшли Ў.М. Навоий кон-металлургия комбинатида ишловчи яқин танишларининг имконияти орқали маҳаллий фуқарони комбинатга қарашли “Маржонбулоқ” ва “Зарафшон” олтин конларидан бирига ишга киритишга ёрдам беришини айтиб, ундан 2 000 доллар талаб қилиб, пулларни олаётган вақтида ушланган.
Шунингдек, ДХХ Самарқанд вилояти бошқармаси ҳамда ИЖҚК департаменти вилоят бошқармаси билан хамкорликда ўтказилган фаол тадбирда Самарқанд туманидаги иккита маҳаллада ҳоким ёрдамчиси лавозимида ишловчи 33 ёшли Х.Э. ва 48 ёшли Б.В. жиноий тил бириктирган ҳолда туман ҳокимлиги захирасидаги 3,5 сотих бўш ерни аукционга чиқариб, ютиб, сўнг туман ҳокимлигида ишловчи танишлари орқали кадастр ҳужжатларини қонуний расмийлаштириб бериш эвазига маҳаллий фуқародан 1 300 доллар талаб қилиб, олдиндан 1 000 АҚШ долларини бўнак сифатида олаётган вақтда ашёвий далиллар билан қўлга олинган.
Қайд этилишича, юқоридаги ҳолатлар бўйича барча шахсларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
“Замин” янгиликларини “Telegram”да кузатиб боринг
