Отабек Умаров Тошкентда Telegram асосчиси Павел Дуров билан учрашди

^{Фото: Telegram / Отабек Умаров}
Марказий Осиё MMA Конфедерацияси президенти Отабек Умаров Тошкентда Telegram мессенжери асосчиси Павел Дуров билан учрашди. Бу ҳақда у ўзининг Telegram канали орқали маълум қилди.

Telegram жамоаси лойиҳа асосчиси Павел Дуров ва унинг акаси Николай айни кунларда Ўзбекистонда.

"Telegram биз учун шунчаки биринчи рақамли мессенжердан каттароқ нарсадир. Биз унинг ёрдамида яқинларимиз билан доим алоқада бўлиш билан бирга, янгиликлардан хабардор бўламиз, ишларни юритамиз, керакли товар ва хизматларни топамиз. Telegram ҳар қандай масалада мобил интернетнинг деярли ҳар бир фойдаланувчисига ёрдам беради", — деб ёзади Отабек Умаров.

Марказий Осиё MMA Конфедерацияси президенти Умаров Павел ва унинг яқинларини меҳмондўст Ўзбекистон заминида қабул қилиш ҳақиқий шарафга айланганини таъкидлади.

"Уларнинг барчаси юксак даражадаги ўз ишининг усталари бўлибгина қолмай, балки дунёга қалби очиқ бўлган ажойиб инсонлар эканига шахсан ишонч ҳосил қилиш — бениҳоя ёқимли ҳиссиётдир. Умид қиламизки, Тошкент, Бухоро ва Самарқанд шаҳарлари қолдирган таассуротлар ҳамда Telegram фойдаланувчилари билан мулоқот уларга янги технологик ечимларни яратишга илҳом беради. Бунга жуда оз фурсат қолганига ишонаман”, — дея қайд этади Отабек Умаров.

Июнь бошларида Telegram асосчиси Павел Дуров ёзни Марказий Осиёда ўтказишини эълон қилганди.

Кейинроқ Telegram асосчиси Павел Дуров Қирғизистонга ташрифи акс этган суратлар ва сафар таассуротларини ўз мухлислари билан бўлишган эди.

Дуров мамлакат ҳақида ниҳоятда илиқ фикрларини билдирган, Қирғизистон тоғлари яқинида отда уюштирган саёҳатини мамнуният билан эслаб ўтганди.

Павел Дуров, Отабек Умаров, Telegram асосчиси “Замин” янгиликларини “Telegram”да кузатиб боринг