Тошкентда қутқарувчилар ҳожатхонага тушиб кетган 1 ёшли болани қутқариб қолди

^{Фото: Фавқулодда вазиятлар вазирлиги}
Тошкент шаҳар Янгиҳаёт тумани Чортоқ маҳалласида жойлашган уйларнинг бирида қутқарувчилар 1 ёшли боланинг ҳаётини сақлаб қолди.

Фавқулодда вазиятлар вазирлиги хабарига кўра, уй эгасининг 2023 йилда туғилган фарзанди эҳтиётсизлик ва назоратдан четда қолганлиги сабабли ҳовлисидаги ҳожатхонага тушиб кетганлиги тўғрисида ФВБга хабар тушган.

Зудлик билан айтилган манзилга қутқарувчилар етиб борган ва махсус қутқарув асбоб-анжомлари ёрдамида ҳожатхона чуқурлигидан болани соғ-саломат олиб чиқиб, ҳаётини сақлаб қолган.