Ўзбекистонда иккиламчи уй-жой нархлари бир оз ошди

Ўзбекистонда 2024 йил август ойида кўчмас мулк бозори фаолиятида бир оз пасайиш кузатилди. Бу ҳақда Иқтисодий тадқиқотлар ва ислоҳотлар маркази таҳлилида қайд этилган.

Унга кўра, август ойида 22,2 мингта кўчмас мулк олди-сотди битимлари рўйхатга олинган, бу июль ойига нисбатан 3,5 фоизга кам бўлиб, савдолар сони 23 мингтани ташкил этган.

Ҳудудлар кесимида кўчмас мулк билан боғлиқ битимларнинг энг катта пасайиши Сирдарё (22,6 фоиз) ва Хоразм вилоятларида (13,2 фоиз), шунингдек Тошкент шаҳрида (9,7 фоиз) қайд этилди.

Иккиламчи бозордаги уй жой нархлари

Август ойида республика бўйича иккиламчи бозор уй-жой нархлари ўртача 0,7 фоиз, йиллик ҳисобда эса (ўтган йилнинг август ойига нисбатан) 9,7 фоизга ошди.

Ҳудудлар кесимида иккиламчи бозор уй-жой нархлари сезиларли даражада Хоразм (21,4 фоиз), Сурхондарё (14,6 фоиз), Бухоро (13,4 фоиз) ва Қашқадарё (13,3 фоиз) вилоятларида кўтарилган.

Тошкент шаҳри иккиламчи уй-жой бозоридаги нархлар ўтган икки ойдагига нисбат пасайишидан сўнг августда барқарорлашди: уй-жой нархи 0,2 фоизга кўтарилиб, бир метр квадрат учун 1128 долларни ташкил этди.

Пойтахтнинг аксарият туманларида иккиламчи уй-жойлар нархи ўзгаришсиз қолди, фақат Миробод ва Олмазор туманларида нархлар мос равишда 1,7 фоиз ва 1,3 фоизга қимматлашди.

Тошкентнинг яна учта туманида нархлар бир оз пасайди — Шайхонтоҳурда - 1,1 фоиз, Сергелида – 0,9 фоиз ва Чилонзорда – 0,6 фоиз. Йиллик ҳисобда Тошкентда иккиламчи уй-жойлар нархининг ўсиши 4,2 фоизни ташкил этди.

Уй-жой ижара бозори

2024 йил август ойида Тошкент шаҳрида уй-жой ижара нархларининг ўтган икки ойдаги пасайишидан сўнг барқарорлашуви кузатилмоқда. Ижаранинг ўртача нархи ўтган ойга нисбатан ўзгармаган — 1 метр квадрат учун 8,3 доллар. Солиштириш учун ижара нархлари июлда 0,6 фоизга, июнда 1,2 фоизга пасайган. Қайд этилишича, бу турли омиллар, жумладан, ижарачилар фаолиятидаги мавсумий тебранишлар билан боғлиқ бўлиши мумкин.

Тошкент шаҳри туманлари кесимида ижара нархидаги фарқлар кескин ўзгармаган. Миробод, Шайхонтоҳур ва Яккасарой туманларида ижара нархи нисбатан юқори бўлиб, ижара нархи 10 доллар атрофида. Бектемир ва Сергели туманларида ижара нархлари нисбатан арзон шаклланиб, ўртача 6 долларни ташкил этди.

Ўтган йилнинг август ойига солиштирганда Тошкент шаҳрида ижара нархлари 7,3 фоизга пасайган. Йил давомида ижара нархининг сезиларли пасайиши Яккасарой (14,8 фоиз), Яшнобод (13,3 фоиз), Шайхонтоҳур (11,5 фоиз) ва Юнусобод (10 фоиз) туманларида кузатилди. «Замин» янгиликларини «Вконтакти»да кузатиб боринг