Иштихонда уч метрлик бўғма илон уйда сақланаётгани аниқланди (фото)

^{Фото: Экология вазирлиги}
Самарқанд вилояти, Иштихон туманида яшовчи фуқаро Б.М. Қизил китобга киритилган, мамлакатга ноқонуний йўллар билан олиб кирилган «Йўлбарс питони»ни сақлаб келаётгани аниқланди.

Самарқанд вилояти Экология, атроф-муҳитни муҳофаза қилиш ва иқлим ўзгариши бошқармаси хабарига кўра, бўғма илоннинг узунлиги 2,78 метр, эни 28 см. Бундай илонлар тутқунликда 25 йилгача умр кўриши мумкин.

Қайд қилинишича, ҳозир илон «Зарафшон» миллий табиат боғи реабилитация марказида вақтинча сақланмоқда.

Илонни уйда сақлаётган фуқарога қандай чора кўрилгани хабарда келтирилмаган.