Ўзбекистонда 2025 йилда 608,1 минг гектар майдонда зарарли чигирткалар тарқалиши прогноз қилинмоқда. Бу эса қишлоқ хўжалиги экинлари ва яйловларга жиддий хавф туғдириши мумкин. Шу сабабли, март-апрел ойлари чигирткага қарши кураш хизмати отрядлари учун муҳим давр ҳисобланади. Ҳозирда Қашқадарё ва Сурхондарё вилоятларида кенг кўламли кимёвий кураш тадбирлари олиб борилмоқда.
Мониторинг ва кураш чоралари
2025 йил феврал-март ойларида 424 минг гектар майдонда чигирткаларга қарши кузатув-назорат ишлари амалга оширилди. Мониторинг натижалари Locust.uz ахборот дастурига киритилди. Бу эса зарарли ҳашаротларнинг тарқалишини олдиндан аниқлаш ва кураш чораларини самарали ташкил этиш имконини бермоқда.
Кимёвий ишловларни самарали ўтказиш учун қуйидаги техника ва воситалар тайёр ҳолга келтирилди:
- 42 та махсус автомашина,
- 181 та трактор,
- 69 та ОВХ-600 ва 113 та ВП-1 пуркагич,
- 584 та моторли қўл пуркагич,
- 28 та сув ташувчи транспорт воситаси.
Бундан ташқари, зарарли чигирткаларга қарши кураш тадбирларини ўз вақтида ташкил этиш ва самарали ўтказиш мақсадида отрядларнинг дислокация харитаси ишлаб чиқилди. Шунингдек, алоҳида мобил ишчи гуруҳлар ташкил этилди.
Ҳозиргача амалга оширилган ишлар
22 мартдан бошлаб Қашқадарё, Сурхондарё ва Самарқанд вилоятларида 5468 гектар майдонда кимёвий ишлов ўтказилди. Мазкур вилоятларда жами 30 та отряд фаолият юритмоқда, уларда 276 та мутахассис жалб этилган. Шунингдек, Жиззах вилоятида ҳам чигирткаларга қарши кураш тадбирлари бошланди.
Ўзбекистон – чигирткаларнинг тарихи ареали
Иқлим шароити туфайли Ўзбекистон чигирткаларнинг ривожланиши ва тарқалиши учун қулай ҳудуд ҳисобланади. Мамлакатда 200 дан ортиқ турдаги чигирткалар учрайди, шулардан 6-8 тури тўда ҳосил қилиш хусусиятига эга. Ушбу зарарли ҳашаротлар қишлоқ хўжалиги экинларига, саксовулзорлар ва яйловларга катта зиён етказиши мумкин. Шу сабабли, ҳар йили уларга қарши кимёвий кураш тадбирлари ўтказилади.
Фуқаролар учун маълумот
Ўсимликлар карантини ва ҳимояси агентлиги зарарли чигиртка тарқалган ҳудуд ҳақида маълумотга эга бўлганлардан қуйидаги телефон рақамлари орқали хабар беришларини сўраган:
📞 1288
📞 71 202 28 88
Эслатиб ўтамиз, зарарли чигирткаларга қарши кимёвий ишлов бепул амалга оширилади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
