2 860
Ўзбекистон ва Япония ўртасидаги меҳнат ҳамкорлиги янги босқичга чиқмоқда. Вазирлар Маҳкамаси ҳузуридаги Миграция агентлиги ҳамда Япониянинг машҳур “Shimizu Corporation” компанияси ўртасидаги музокаралар натижасида юртдошларимиз учун Япониядаги иш имкониятлари янада кенгаймоқда.
Shimizu — 200 йиллик тарихга эга гигант
1804 йилда ташкил этилган “Shimizu Corporation” — Япониянинг энг йирик ва обрўли қурилиш компанияларидан бири. Корхона қурилиш, архитектура, муҳандислик ва лойиҳалаш соҳаларида фаолият олиб боради. Компаниянинг йиллик айланмаси 15 миллиард доллардан ошади.
Айни пайтда компанияда 150 нафар ўзбекистонлик мутахассис турли лойиҳаларда вақтинча меҳнат фаолиятини амалга оширмоқда. Улар асосан қурилиш ва ишлаб чиқариш тармоқларида ишламоқда.
Келишув — янги эшикларни очмоқда
Томонлар ўртасида ўтказилган музокараларда Япониянинг турли ҳудудларида юртдошларимизни ишга жойлаштириш кўламини янада кенгайтириш масаласи муҳокама қилинди. Эътиборлиси, эндиликда ҳайдовчилик соҳасида ҳам ўзбекистонликлар учун иш имкониятлари очилиши кутилмоқда.
Музокаралар якунида мазкур ҳамкорликни расмийлаштирувчи меморандум имзоланди. Унда Япониянинг барча ҳудудларида қурилиш, ишлаб чиқариш ва хизмат кўрсатиш соҳаларида ҳамкорлик қилиш кўзда тутилган.
Ўзбек ҳайдовчиларига ҳам ишчи визалар очилади
Янги меморандум, айниқса, япон бозорида ҳайдовчи сифатида ишлашни хоҳлаётган фуқароларимиз учун катта имконият саналади. Режага кўра, ишчи ўринлари сони босқичма-босқич оширилиши кутилмоқда.
Сиз Японияда ишлашни хоҳлармидингиз?
Zamin.uz бу мавзудаги энг муҳим янгиликларни ёритишда давом этади.
11:17, 3-04-2025
