Мирзиёев Россияда: Президент Ғалаба куни маросимида ва муҳим музокараларда иштирок этади

Ўзбекистон Республикаси Президенти Шавкат Мирзиёев расман 8–9 май кунлари Россия Федерациясига амалий ташриф билан йўл олади. Ушбу ташриф Россия президенти Владимир Путиннинг таклифи асосида амалга оширилаётгани маълум қилинди.

Расмий дастурга кўра, Президент Мирзиёев ташриф доирасида Москва шаҳрида бўлиб ўтадиган Иккинчи жаҳон урушида қозонилган Ғалабанинг 80 йиллигига бағишланган тантанали тадбирларда фаол иштирок этади. Бу – жаҳон тарихидаги энг оғир ва ҳал қилувчи урушда ҳалокатга учраган миллионлаб инсонларни ёдга олиш, тинчлик учун қиммат баҳога эришилганини эътироф этишга қаратилган муҳим воқелик ҳисобланади.

Шунингдек, ташриф доирасида давлатимиз раҳбари Россия Федерацияси етакчиси Владимир Путин билан икки томонлама музокаралар ўтказиши кутилмоқда. Суҳбатларда икки давлат ўртасидаги стратегик шериклик, савдо-иқтисодий ҳамкорлик, инвестиция лойиҳалари, транспорт ва энергетика соҳаларидаги ҳамкорликни янада чуқурлаштириш масалалари муҳокама қилинади.

Бундан ташқари, турли соҳалардаги ўзаро ҳамкорлик бўйича бир қатор янги келишувлар ва лойиҳалар юзасидан ҳам келишувларга эришилиши мумкин. Ташриф доирасида кўплаб расмий делегация вакиллари, вазирлик ва идоралар раҳбарлари ҳам иштирок этиши кутилаяпти.

Шу тариқа, Шавкат Мирзиёевнинг бу галги Россияга ташрифи нафақат тарихий хотирани эъзозлаш, балки икки давлат ўртасидаги мустаҳкам муносабатларни янада мустаҳкамлаш йўлидаги навбатдаги муҳим қадам бўлиб қолиши мумкин.

Zamin.uz мазкур ташриф доирасидаги барча воқеа ва янгиликларни тезкор ёритишда давом этади. «Замин»ни Telegram’да ўқинг!