Ҳақиқат фош бўлди: Ер сотишда пора олган ҳоким ўринбосари қамалди

Ҳақиқат олдида ҳеч ким дахлсиз эмас — ниҳоят, қонун устуворлиги ўз сўзини айтди. Қўшкўпир тумани ҳокимининг собиқ ўринбосари Бекзод Давлатов томонидан содир этилган коррупцион жиноятлар фош этилди ва у қонун олдида жавоб берди. Суд ҳукми асосида у 8 йилдан зиёд озодликдан маҳрум этилди.

Бу воқеа Ўзбекистонда амалга оширилаётган шиддатли ислоҳотлар, хусусан, коррупцияга қарши курашда давлатнинг қатъий иродасини яна бир бор намоён этди. Бу галги фош этиш Хоразм вилоятининг Қўшкўпир туманида амалга оширилди — ҳоким ўринбосари лавозимида ишлаган шахс катта миқдордаги пора олишга урингани учун жавобгарликка тортилди.

Бекзод Давлатов исми коррупция билан боғлиқ жиноий иш доирасида кенг жамоатчилик эътиборини тортди. 1991 йилда туғилган Давлатов туман ҳокимининг қишлоқ ва сув хўжалиги масалалари бўйича ўринбосари сифатида фаолият юритган. Унинг фаолияти давомида, афсуски, хизмат ваколатларидан суиистеъмол қилиб, шахсий манфаатни кўзлаб, фуқароларни алдашга уринаётгани маълум бўлди.

Таъкидлаш жоизки, Давлатов ўз ваколатига кирмайдиган масала — яъни ҳокимлик захирасида бўлган ерларни аукцион орқали расмийлаштириш бўйича фуқарога ёлғон ваъдалар берган. Суд ҳужжатларида қайд этилишича, у 2024 йил 12 ноябрь куни фуқаро Х.И.га 51,1 гектар ер майдонини расмийлаштириб беришини айтган ва бунинг эвазига 25 минг доллар ҳамда ҳужжатлар учун 50 миллион сўм талаб қилган.

Энг ачинарлиси, Давлатов шунча билан чекланмай, ушбу пулларни олиш мақсадида фуқарони мансабдор шахсга пора беришга даъват қилган. Бу — жиноят кодекси бўйича жиддий жавобгарликни назарда тутадиган ҳаракат ҳисобланади. Унинг бу ҳаракати нафақат алдамчилик, балки фуқарони жиноятга чорлаш, уни пора беришга ундаш каби оғир айбловларга сабаб бўлди.

2025 йил 11 апрел куни Жиноят ишлари бўйича Тупроққалъа туман суди томонидан чиқарилган ҳукмда Бекзод Давлатовга нисбатан 8 йил 1 ой муддатга озодликдан маҳрум қилиш, шунингдек, 2 йил давомида давлат корхоналарида моддий жавобгар ёки мансабдор шахс сифатида ишлаш ҳуқуқидан маҳрум этиш жазоси тайинланди. Суд унинг жазони умумий тартибдаги колонияда ўташига қарор қилди.

Кейинчалик, ушбу суд ҳукми Хоразм вилояти суди томонидан апелляция тартибида кўриб чиқилди. Судлов ҳайъати 2025 йил 16 июндаги ажримида биринчи инстанция суди ҳукмини ўзгаришсиз қолдирди. Бу эса суднинг адолатли қарор қабул қилганини яна бир бор тасдиқлади.

Бу воқеа халқ орасида кенг муҳокамаларга сабаб бўлди. Аҳоли орасида коррупцияга қарши курашиш йўлидаги қатъий чоралар қўллаб-қувватланаётгани, айниқса, мансабдор шахслар томонидан содир этилаётган бундай қилмишларнинг жазосиз қолмаслиги аҳамиятга моликдир. Давлат раҳбарияти томонидан олиб борилаётган сиёсат — “ҳеч ким қонундан устун эмас” тамойилининг амалдаги ифодаси сифатида баҳоланмоқда.

Жамиятда адолат устувор бўлиши учун, албатта, ҳар бир мансабдор шахс ўз бурчига сидқидилдан ёндошиши, давлат ишончига хиёнат қилмаслиги шарт. Афсуски, баъзилар бу ишончни шахсий манфаатлари йўлида қурбон қилишга тайёр эканини амалда кўрсатмоқда. Лекин бу каби воқеалар нафақат жиноятчига жазо берилиши, балки бошқалар учун ҳам муҳим сабоқ бўлади.

Қисқаси, ҳоким ўринбосари лавозимида ишлаган Бекзод Давлатовнинг қилмиши суд орқали очиқ ва ошкора тарзда фош этилди. Бу фақатгина жисмоний шахсга қарши эмас, балки тизимдаги ҳалоллик ва шаффофлик учун ҳам муҳим қадам бўлди. «Замин»ни Telegram’да ўқинг!