Қашқадарё вилоятида йўл ҳаракати қоидаларини қўпол равишда бузган ҳайдовчи устидан қатъий чора кўрилди. 11 сентябрь куни Шаҳрисабз шаҳрида содир бўлган ҳодиса ижтимоий тармоқларда катта муҳокамаларга сабаб бўлди.
Видеолавҳаларда акс этган ҳолатда, пиёдалар йўлакчасидан ўтаётган ўқувчига бошқа автомобиллар йўл бергани, аммо “Damas” ҳайдовчиси ҳаракатни тўхтатмагани кўринади. Натижада бола хавфдан қочиш учун югуриб кетар экан, мувозанатини йўқотиб йиқилган ва автомобиль катта тезликда унинг ёнидан ўтиб кетган. Омадга кўра, бола оғир жароҳат олмаган.
Йўл ҳаракати хавфсизлиги бошқармаси маълумотига кўра, қоидаларни бузган 68 ёшли ҳайдовчи тезда аниқланган ва унга нисбатан маъмурий иш қўзғатилган.
Шаҳрисабз шаҳри суди қоидабузарни БҲМнинг 25 баравари (10,3 миллион сўм) миқдорида жарима тўлашга мажбур қилди. Шунингдек, ҳайдовчи бир йил муддатга транспорт бошқариш ҳуқуқидан маҳрум этилди.
Мутахассислар таъкидлашича, ушбу ҳодиса йўлларда пиёдалар, айниқса болалар хавфсизлигини таъминлаш қай даражада муҳим эканини яна бир бор кўрсатди. Жамоатчилик эса бундай қонунбузарликларга нисбатан янада қатъий чоралар кўриш зарурлигини таъкидламоқда.
«Замин»ни Telegram’да ўқинг!
