Ангренда йирик ЙТҲ содир бўлди: икки инсон ҳаётидан айрилди
Тошкент вилоятининг Ангрен шаҳрида А-373 йўлида HOWO юк машинаси ҳайдовчиси бошқарувни йўқотиши оқибатида тўртта автомобиль билан тўқнашиб, йирик ЙТҲ содир этди. Фожиа натижасида «Cobalt» машинасида бўлган икки киши воқеа жойида ҳалок бўлди, яна тўрт нафар фуқаро турли даражадаги жароҳатлар билан шифохонага ётқизилди. Мазкур ҳолат юзасидан жиноят иши қўзғатилиб, юк машинаси ҳайдовчиси процессуал тартибда ҳибсга олинган.
Фото: Тошкент вилояти ИИББ
Тошкент вилоятининг Ангрен шаҳри ҳудудида содир бўлган оғир йўл-транспорт ҳодисаси икки инсон ҳаётига зомин бўлди. Фожеа жорий йилнинг 26 апрель куни А-373 автомобил йўлининг 93-километрида юз берган.
Дастлабки маълумотларга кўра, НОWО русумли юк автомобилини бошқариб кетаётган 1995 йилда туғилган ҳайдовчи ҳаракат вақтида транспорт воситаси устидан назоратни йўқотган. Оқибатда юк машинаси шу йўналишда ҳаракатланаётган яна тўртта транспорт воситаси билан тўқнашиб кетган.
ЙТҲ натижасида «Cobalt» русумли автомашинада бўлган ҳайдовчи — 1975 йилда туғилган И.Х. ҳамда йўловчи — 1986 йилда туғилган З.Т. воқеа жойида ҳалок бўлган. Бу хабар кўпчиликни ларзага солди — бир лаҳзада икки оилага қайғу кирди.
Шунингдек, бошқа транспорт воситаларида бўлган яна 4 нафар фуқаро турли даражада жароҳат олиб, шифохонага олиб кетилган. Уларга малакали тиббий ёрдам кўрсатилмоқда.
Ҳозирда мазкур ҳолат юзасидан Тошкент вилояти ИИББ ҳузуридаги Тергов бошқармаси томонидан Жиноят кодексининг 266-моддаси 3-қисми «а» банди асосида жиноят иши қўзғатилган. Юк машинаси ҳайдовчиси процессуал тартибда ушлангани маълум қилинди. Унинг ўзи жароҳат олмаган.
Қисқача айтганда, йўл — кечирмайди. Бир лаҳзалик эътиборсизлик ортида қайтмас оқибатлар туриши мумкин. Ҳар бир рул ортидаги қарор — ҳаёт масаласи.
Изоҳлар 0
…