Президент кейинги 2 йилда Мўйноқда янги шаҳарча қуришни топширди

Ўзбекистон президенти Шавкат Мирзиёев кейинги икки йилда Мўйноқда 20 та кўп қаватли уй қуриш, янги шаҳарча барпо этиш бўйича топшириқ берган. Шу билан бирга, у ерда замонавий шаҳарсозликдаги барча янгиликларни жорий этиш, намунавий инфратузилма яратишни ҳам айтган, дея хабар беради президент матбуот хизмати.

15 ноябрь куни Шавкат Мирзиёев Мўйноқ туманига борган. Давлат раҳбари лойиҳалар тақдимоти билан танишган. Мўйноқнинг мавжуд салоҳияти, табиий имкониятларидан фойдаланиб, ички бозорга керакли маҳсулотлар ишлаб чиқариш бўйича топшириқлар берган.

"Орол фожиасидан энг кўп зарар кўрган асли шу – Мўйноқ аҳолиси, – деган Шавкат Мирзиёев. – Уларнинг сабр-қаноати, ватанпарварлиги, меҳнаткашлиги учун раҳмат айтишимиз, шунга муносиб хизмат қилишимиз керак".

Мўйноқ Ўзбекистоннинг энг шимолий ҳудуди бўлиб, у ерда 30 мингдан зиёд аҳоли яшайди. Матбуот хизмати хабарига кўра, 2019 йилда Мўйноқ туманида яна кўплаб – саноат соҳасида 12 та, қишлоқ хўжалигида 5 та, хизмат кўрсатиш бўйича 14 та лойиҳа амалга оширилади.

Шунингдек, Шавкат Мирзиёев Экология музейи залида маҳаллий аҳоли вакиллари билан ҳам учрашган. «Замин»ни Telegram’да ўқинг!