Давлат “Coca-Cola”дан сўнг “Pepsi Uzbekistan”даги улушини сотади

“International Beverages Tashkent” МЧЖ ҚКдаги 24 фоизлик давлат улуши сотувга қўйилади. Бу Президентнинг 19 февралдаги давлат мулки объектларидан самарали фойдаланиш бўйича қўшимча чора-тадбирлар тўғрисидаги Фармонида белгилаб берилди.
Давлат статистика қўмитаси маълумотига кўра, ушбу қўшма корхонада давлатнинг улуши 24 фоиз бўлса, қолган 76 фоизи Holten Group Corp. компаниясига тегишлидир.

“International Beverages Tashkent” Zip, 7up, Adrenaline Rush, Lipton ва Miranda савдо маркалари учун ҳам жавоб беради. Ушбу компания заводи 2011 йилда Sebur ичимликлари ишлаб чиқариш базасида очилган эди.
Яқин ойлар ичида активларни сотувга қўйиш қиймати ва муддатлари аниқлаб олинади.

Бундан олдин давлат “Coca-Cola”даги улушини сотувга қўйиши айтилганди. 2018 йил сентябрь ойида компания акцияларининг назорат пакети(51,7 фоизи) “Ўзбекозиковқатхолдинг”га, қолган 42,9 фоизи “The Coca-Cola Export Corporation”га тегишли эканлиги маълум бўлган.
“Ўзбекозиковқатхолдинг” ўз улушини хорижлик инвесторга сотиши кутиляпти. Бунда Европа тикланиш ва тараққиёт банки воситачи вазифасини бажаради ва битимни расмийлаштиришга ёрдам беради.

Янгиликлар