Янги метрополитен

  • 07 март 2019, 15:58
  • 2 429
  • Жамият
  • Янги метрополитен
    Янги метрополитен қурилибди. Йўналишлар ва бекатлар сони 100 дан ортиқ эмиш. Бу миш-мишми ёки ҳақиқатлигини билишни истадим. Қизиқ?! Йўловчи сифатида тушиб кўрмоқчи бўлдим.

    Касса атрофи одамлар билан гавжум, навбат кута-кута тангача олдим. Шошиб тушишим биланоқ поезд келди. Катта ёзувларда ёзилган “ҲАЁТ ПОЕЗДИ” қаршимда тўхтади. Оломон ўзини вагон ичига урди. Эшиклар ёпилиб, поезд йўлга тушди. Бир оз ўтиб, сухандоннинг ёқимли овози эшитилди:
    Кейинги бекат “Инсофсизлик”.

    Ҳайрон қолдим. Эшиклар очилиши билан одамлар тушиб-чиқди.
    Кейинги бекат “Ахлоқсизлик”.

    Сўнг “Кибр” бекати номи ҳам жаранглади. Сониялар, дақиқалар, соатлар ўтяпти, мен ҳали ҳамон вагондаман. Қулоғимга “Оқибатсизлик”, “Очкўзлик”, “Таъмагирлик”, “Меҳрсизлик” бекатларидан ўтдим.

    Шу кўйи йўлда боравердим. Олдимда ҳеч ким қолмади. Кутилмаганда “Охирги бекат “Виждон” деган овоз эшитилди. Юзимга табассум югурди. Чироқлар ўчиқ, совуқ жойни кўриб нима қилишни билмай қолдим. Метрополитен ходими олдимга келди.

    – Сизга чиқиш йўлини кўрсатаман. Бу бекат тўлиқ қуриб, тугатилмаган. Сиз биринчи йўловчи бўлиб келдингиз.

    Мен бўлсам, “Виждон” бекати тезроқ ишга тушиб, инсонлар манзилига етиб келсин дея чиқиб кетдим.
    Зарнигор АҲМEДОВА

    Манба: Qalamtarosh телеграм канали

    » » Янги метрополитен