Пок жойдаги нопок қилмиш

Одатда одамлар гуноҳларини ювиш, Аллоҳнинг фарзларини адо этиш учун масжидга келадилар. Бу масканда бўлар-бўлмас сўзлардан, ғийбат қилиб қўйишдан тийиладилар. Чунки, масжид рамзий маънода Аллоҳнинг уйи деб ҳисобланади.

Буни қарангки, кўча-кўйда, ўз уйида қилаётган гуноҳлари, ҳуқуқий нуқтаи назардан катта-кичик тартиббузарлик, ҳуқуқбузарлик ва баъзан жиноятлари камлик қилганидек, Аллоҳнинг уйи, яъни масжидда ҳам ўғирлик қилишдан чўчимайдиганлар ҳам бор экан. Велосипедда намозга келадиганларни кузатиб юрган кишининг бундай нопок мақсадига “улов”ини қулфламай кириб кетадиганларнинг ишончи айни муддао бўлди.

Хуллас, илк бор бу хунук иш содир этилганда, дарҳақиқат одамлар ёқа ушлашди. Ҳатто ишонишмади. “Наҳотки?! Астағфуриллоҳ, болаларингиз олиб кетгандир-е”, дейишди. Шу билан на арз қилишини, на қилмаслигини билган жабрланувчи ўғрини худога солиб қўя қолди. Орадан бир ой ўтиб ўтмасдан эса...

Яна такрорланган ўғирлик кишиларни энди ҳайратга солибгина қолмай, хушёрликка хам чорлади. 1.100.000 сўмлик қимматбаҳо велосипеди йўқолган фуқаро эса ички ишлар бўлимига мурожаат қилди. Назоратга олинган объектда роппа-роса бир ойдан сўнг учинчи бор ўғирлик содир бўлади.

Ўғирланган велосипедларни Учқўрғон бозорида арзон-гаров сотиб юраверган, Уйчи туманида яшовчи фуқаро, бир неча набиралар бобоси, айбдор М.М. судда шундай илтижо қилди: “Қилмишим туфайли болаларимнинг турмуши нотинч бўлди, мен билан муросалари кетди, шарманда бўлдим, шунинг ўзи катта жазо менга. Илтимос енгиллик беринглар. Барчасини тўлайман, қайтараман...”

- Дарҳақиқат, ўғирланган велосипедлар топилиб, эгаларига қайтарилди, - Жиноят ишлари бўйича Наманган вилоят суди Суд амалиётини таҳлил қилиш бўлими бошлиғи А. Арипов. - Жабрдийдалар эса даъволаридан кечдилар. Инсонпарварлик, кечиримлилик ва албатта одиллик принциплари билан йўғрилган суд, буларнинг барчасини инобатга олди. М. М. озодликдан маҳрум этиш билан боғлиқ бўлмаган жазо билан кифояланди.

Аммо унинг бу ишдан топгани (агар бўлса) йўқотганлари ўрнини боса олармикан?..
Хулоса сиздан. Хар холда сиз бундай кўйга тушиб қолишни истамасдингиз, тўғрими?!

Воқеани баён қилишдан муддао ҳам шу - нопок йўлнинг оқибатини ҳис эттиришу, ундай кўргуликдан сизни, фарзандингизни, оилангиз ва маҳаллангизни, демакки жамиятни асраш!

«Замин»ни Telegram’да ўқинг!