Газ ўтмаса ҳам ҳисоблайдиган ҳисоблагични мутахассислар ўрганишди

Ижтимоий тармоқларда газ ҳисоблагичнинг ҳеч қандай тармоққа уланмасдан, рақамларни айлантираётгани ва кўрсаткичларни ўзгартираётгани намойиш этилган видео пайдо бўлган эди.
Маълумот учун видеодаги СГУ-G-6 табиий газ ҳисоблагичи, "Счетприбор" ЁАЖ заводида ишлаб чиқарилган.

"Ҳудудгазтаъминот" АЖ мутахассислари видеода акс этган ҳолат билан ижтимоий тармоқлар орқали тарқатган фуқаро Ибраим Аблаев билан боғланишди. Суҳбат давомида, ушбу газ ҳисоблагичлари Тошкент шаҳри, Чилонзор тумани, "Гавҳар" кўчасидаги 7/1, 7/2, 7/3, 7/4, 7/5 ва 5/1, 5/2, 5/3, 5/4, 5/5 рақамли уйларга 2018 йил август-сентябрь ойларида ўрнатилганлиги маълум бўлди.

Ҳаммаси бўлиб, янги қурилган биноларда 80 га яқин хонадонлар мавжуд бўлиб, газ ўлчаш мосламаларини ўрнатиш билан пудратчи - хусусий тадбиркор Мавлон Туронбеков шуғулланган экан. Видео муаллифи "Ҳудудгазтаъминот" АЖ матбуот хизматига газ ўлчаш мосламасининг бошқа фотосуратларини тақдим этди.

Ҳолатга ойдинлик киритиш ҳамда табиий газ истеъмолчиларига ёрдам кўрсатиш мақсадида, "Ҳудудгазтаъминот" АЖ Бошқарув раисининг биринчи ўринбосари А.Саидвалиев бошчилигидаги ишчи гуруҳи тузилди. 2019 йил 9 декабрь куни акциядорлик жамияти вакиллари юқоридаги манзилга етиб бориб, "Гавҳар" кўчасида янги турар-жой биноларида истиқомат қилаётган аҳоли вакиллари билан учрашдилар.

Барча ташкилот ва идора вакиллари томонидан, истеъмолчиларнинг шикоятлари тингланиб, ҳар томонлама ўрганиб чиқилди. Хонадонларга ўрнатилган ҳисоблагичлар ташқи текширувдан ўтказилиб, фуқаро Ибраим Аблаевнинг газ ҳисоблагичи "Ўзстандарт" агентлигига эксперт текширувига юборилди.

Учрашувда иштирок этган бошқа хонадон эгалари, газ таъминоти ташкилотига шикоятлари йўқлигини маълум қилишди. “Замин” янгиликларини “Youtube”да кузатиб боринг