Экологик партия вакилларига ўзларини арқон билан дарахтларга боғлаб қўйиш таклиф қилинди (видео)

Халқаро пресс-клубда ўтган сиёсий партияларнинг навбатдаги матбуот анжуманида журналист Малоҳат Йўлдошева Экологик партия аъзоларига ўзларини дарахтга боғлаб қўйишни таклиф қилди.

“Мана, сизларнинг партиянгиз тузилганига 11 ой, сайлов кампанияси бошланганига эса 85 кун бўлди. (Сайловгача) яна 5 кун вақтинглар қолди. Шу вақт давомида партиянгиз аниқ нима иш қилди? Мана шу охирги 85 кун ичида нечта дарахт кесилди? Бутун дунёда экопартия аъзолари, экологик қўмита эмас, экопартия аъзолари дарахтларнинг ҳимоячиси саналади.

Агар бирон жойда дарахт кесиладиган бўлса, улар ўша ерга бориб, ўзини кесилаётган дарахтга боғлаб олади: “Агар кесадиган бўлсанг, аввал мени кес”, дейди. Мен шунинг учун сизларга атайлаб арқон олиб келдим. Ўзингларни кесилаётган дарахтларга боғлаб олинглар”, деган журналист Экологик партия вакилига жонли эфир вақтида арқон тутқазди.

У арқонни бераётган вақтда Халқаро пресс-клуб спикери Экологик партия вакилидан “Партиянгизда қанча аъзо бор?” – деб сўради. “350 мингдан ортиқ”, деган жавобни олгач, “Сизларга бундай арқондан яна 350 мингта керак бўлар экан”, дея киноя қилди.
“Замин” янгиликларини “Twitter”да кузатиб боринг