“Яхши қиз, танишсак бўладими?”

Ёш йигит бир қизни бошини айлантириш ниятида қўл телефонига шундай хат жўнатди:
— “Яхши қиз, танишсак бўладими?”

— “Бўлади. Лекин бир нарсани аниқлаб олишим керак. Кимлигимни ростдан билмайсанми?!” – деди қиз. Қизнинг жавоби ажабланарли эди. У сўзида давом этди:
“Мен азият бермаслигинг ва сенинг бир парчанг эканимни унутмаслигинг учун қовурғангдан яралган аёлман..
Мен Жаннатда ёлғизликдан эзилиб юрган вақтингда Аллоҳ таоло сенга туҳфа қилган аёлман...
Мен хонадонинг кўрки бўлган онаг, синглинг ва аёлингман.
Мен “Нисо”, “Мужодала”, “Нур”, “Талоқ” ва “Марям” сурасиман.
Мен она бўлганимда Жаннат қадамларим остида бўладиган аёлман.
Мен Аллоҳ таоло меросдаги ҳиссангнинг ярмини менга берган аёлман. Таҳқирлаш учун эмас балки, барча ишларимни сен бошқаришинг учун.
Мен Расулуллоҳ соллаллоҳу алайҳи васаллам мен ҳақимда умматларига қарата: “Аёлларга яхшилик қилишингизни васият қиламан!” – деган аёлман.
Мен Роббим унга: “Е, ич ва кўзинг қувонсин...”( Марям-26) - деган аёлман.
Мен зеб-зийнатлар ичида парваришланадиган аёлман.
Мен солиҳа бўлсам мингта бетавфиқ эркакдан афзал бўладиган аёлман.

Агар сен кўнгилхушлик излаётган бўлсанг, ўша ўйин-кулгу, эрмак саҳифаларига кетавер. Мен ва мен кабилар ижтимоий тармоқларга Аллоҳ таолонинг калимасини олий қилиш, Расулуллоҳ соллаллоҳу алайҳи васалламнинг фазилатларини ёйиш ва яна нафсини шайтонга топшириб қўйганларни тўғри йўлга йўллаш учун кирдик!

Энди сендан сўрасак, сен кимсан?”
— "Мен Аллоҳга тавба қилувчиман! Сени дунёга келтириб, гўзал тарбия берган ота-онангга Аллоҳ таолонинг чексиз мукофотлари бўлсин!" - деб жавоб берди йигит.


Манба: Azon.uz