VALERY SHARIFULIN/TASS
Москвада яна 5 кишида коронавирус аниқланди, яна бир ҳолат Россиянинг Нижний Новгород шаҳрида қайд этилган. Айни вақтда дунёда коронавирусга чалинганлар сони 100 мингдан ошиб кетди.
Эпидемиологик тадқиқотлар маркази маълумотига кўра, ушбу вирус аниқланган барча россиялик беморлар сўнгги икки ҳафта ичида Италияда бўлишган. Ҳозирда уларнинг барчаси инфекцион бўлимларга жойлаштирилган.
Бунгача Россияда вирусдан зарарланишнинг тўрт ҳолати қайд этилганди — Тюменда, Байкал орти ўлкасида, Санкт-Петербургда ва Москвада.
Бундан ташқари, Россиянинг уч фуқароси «Diamond Princess» круиз лайнерида вирус юқтириб олган.
Москва таълим ва фанлар департаменти маълум қилишича, 10 март кунидан эътиборан коронавирус тарқалган мамлакатлардан келган талабалар пойтахтдаги олий таълим муассасаларида ўқишга қўйилмайди ва улар ўз турар жойида икки ҳафталик карантинда бўлади - улар масофадан туриб таълим олишлари мумкин.
Коронавирус Россияда қандай пайдо бўлмоқда?
Душанба куни коронавирусга қарши кураш штаби ва «Роспотребнадзор» инфекция Италиядан қайтган россияликда аниқлангани ҳақида маълум қилганди.
«2 март куни Италиядан келган Россия фуқаросида Covid-2019 коронавирус инфекцияси аниқланди. Текширувлар натижасига кўра, ушбу ёш йигит Италияда таътилда бўлганида, 2020 йилнинг 21 февралида вирусни юқтириб олган», дейилганди штаб хабарида.
Ушбу фуқаро Россияга 23 февраль куни қайтган ва Москва областидаги уйида яшашда давом этган, 27 февраль куни эса поликлиникага мурожаат қилган, уни инфекцион шифохонага жўнатишган.
Москва мэри Сергей Собянин ўша куни шифокорлар ушбу бемор билан бирга Италиядан Москвага рейс орқали келган яна 13 нафар йўловчини ҳамда беморнинг яқинлари бўлган 11 кишини шифохонага ётқизишгани ҳақида маълум қилди.
5 март куни Москвада коронавирус тарқалиши таҳдиди туфайли «юқори шайлик режими» жорий этилди. Пойтахт мэри имзолаган фармонга кўра, сўнгги кунларда 11 давлатдан (Буюк Британия, Германия, Эрон, Испания, Италия, Хитой, Норвегия, АҚШ, Франция, Швейцария ва Жанубий Корея) келган москваликлар икки ҳафта давомида ўзини ўзи изоляция қилиши керак.
Фармонда қайд этилишича, тиббиёт муассасалари, кўп қаватли турар жойлар, жамоат транспорти ва бошқа хизматларда юқори шайлик режими амал қилади.
Шунингдек, Петербург иқтисодий форуми ташкилотчилари коронавирус туфайли 3-6 июнь кунларига белгиланган тадбирни бекор қилишган. Айни вақтда Санкт-Петербургдаги Мечников номидаги давлат шимоли-ғарбий тиббиёт университетининг 700 нафардан ортиқ талабаси карантинга олинган. Бунга италиялик талабада коронавирус кузатилгани сабаб бўлган.
Мечников номидаги давлат шимоли-ғарбий тиббиёт университети / REUTERS
Сўнгги маълумотларга кўра, вирусдан зарарланиш ҳолатлари 100 мингдан ошиб кетган. 55694 киши тузалиб кетган, 3412 киши вафот этган.
Жума куни Перу, Бутан, Ватикан, Сербия ва Камерун каби давлатлар ҳам ўз ҳудудида коронавирусдан зарарланиш ҳолатлари аниқланганини тасдиқлади.
Айни вақтда энг кўп зарарланиш ҳолатлари Хитойнинг материк қисми (80 576 ҳолат, 3042 ўлим), Жанубий Корея (6593 ҳолат, 43 ўлим), Эрон (4747 ҳолат, 124 ўлим) ҳамда Италия (3858 ҳолат, 148 ўлим) давлатларида қайд этилган. Коронавирусдан зарарланишнинг камида бир ҳолати тасдиқланган давлатлар сони 90дан ошади.
Жаҳондаги вазият
Британияда жума куни коронавирусдан зарарланишнинг яна 48 ҳолатини аниқлашди - бу мамлакатда инфекция тарқала бошлаганидан буён энг юқори ўсиш кўрсаткичидир. Айни вақтга келиб вирусдан зарарланганларнинг жами сони - 163 нафар.
6 март куни бир бемор - сурункали касаллиги бор бўлган 70 ёшли аёл Редингдаги шифохонада вафот этган.
Шунингдек, жума куни Бакинҳемпшир графлигининг Милтон-Кинс шаҳридаги шифохонада оламдан ўтган 80 ёшли бемор ўлимига ҳам коронавирус сабаб бўлгани тахмин қилинмоқда. Тиббиёт ходимлари таҳлил натижаларини кутишмоқда. Ушбу беморга қараган тиббиёт ходимлари карантинга жўнатилган.
British Airways авиакомпанияси икки ходими коронавирусга гумонланаётгани ҳақида хабар берган. Улар изоляция қилинган.
Жума куни Ватикан ўз ҳудудида коронавирусга чалинишнинг илк ҳолатини тасдиқлади. Беморнинг шахси очиқланмаган, фақат у Ватикандаги поликлиникага мурожаат қилгани маълум. Ватикан Соғлиқни сақлаш ва гигиена бошқармаси дезинфекция қилиш чора-тадбирларини амалга оширади.
Шунингдек, Сербия cоғлиқни сақлаш вазирлиги мамлакат ҳудудида COVID-19 коронавирусидан илк зарарланиш ҳолатини тасдиқлади: Суботицада 43 ёшли эркак вирус юқтирган, у яқинда Будапештдан қайтганди, у айни вақтда шифохонанинг алоҳида палатасига жойлаштирилган, ҳолати қониқарли деб баҳоланмоқда.
Словакия бош вазири Братиславада 52 ёшли эркакда вирус аниқланганини маълум қилди, у яқин орада мамлакатдан ташқарига чиқмаган, аммо унинг ўғли Венецияда бўлиб қайтган.
Чехияда 12 бемор қайд этилган, уларнинг барчаси Италия шимолига сафарлар билан боғлиқ.
Нидерландияда коронавирусдан илк ўлим ҳолати қайд этилди: Роттердам шифохонасида 86 ёшли эркак оламдан ўтди. Бу мамлакатда жами 82 кишида Covid-19 аниқланган.
Италияда 5 март куни яна 41 киши вафот этган ва бу мамлакатда вирус қурбонлари сони 148 кишини ташкил этмоқда. Ҳукумат ҳозирча инфекция тарқалиши олдини ололмаяпти: сўнгги бир кунда 800 кишида вирус аниқланган ва беморлар сони 3 858 кишига етган.
Италиянинг Падуе шаҳрида кўчадаёқ тест ўтказилмоқда / EPA
Францияда вирус юқтирганлар сони 423 нафар бўлиб турибди, етти киши коронавирусдан вафот этган. Мамлакатда 150 мактаб ёпилган. Франция Миллий ассамблеяси аъзоси Жан-Люк Рейцер коронавирус билан касалланган, у оғир аҳволда касалхонага ётқизилган. Француз ҳукумати 100 мл идишдаги қўл учун гелга максимал нарх белгилаган - 3 евро. Бу нарх 31 майга қадар амалда бўлади.
Миср соғлиқни сақлаш вазирлиги жума куни Нил дарёси орқали Луксордан Асуан шаҳрига келган кема йўловчиларининг 12 нафарида вирус аниқлади, аммо уларнинг ҳеч бирида ташқи белгилар бўлмаган. Бунгача мамлакатда 3 кишида вирус аниқланганди, беморлардан бири соғайиб кетган.
АҚШда пайшанба куни вертолёт орқали Сан-Франциско қирғоқлари яқинида карантин ҳолатида турган «Гранд принцесс» круиз лайнерига касалликни аниқлаш тўпламлари туширилди, кемада жами 3,5 минг киши бор, улардан 142 нафари британияликлар.
«Гранд принцесс» круиз лайнерида 3,5 мингдан ортиқ киши карантинда / EPA
Февраль ойида ушбу лайнерда Мексикага саёҳат қилган 71 ёшли эркак 3 март куни Лос-Анжелесда вафот этди, унда ўлимидан кейин COVID-19 аниқланган. У билан бир вақтда круиз лайнерда саёҳат қилган яна икки киши айни вақтда Шимолий Калифорниядаги шифохонага коронавирус ташхиси билан ётқизилган. 4 март куни кема карантинга олинди.
Вашингтон штатининг Сиэтл шаҳри атрофидаги ҳудудда 20та янги ҳолат қайд этилди. Бу штатдаги беморлар сони 70 нафарга етди.
Сиэтлдаги айрим фирмалар, хусусан Microsoft ва Amazon ўз дўконларини ёпган ва ходимларидан вақтинча уйдан ишлаб туришни сўраган.
Род-Айленд штатида 200 киши карантинга жойлаштирилган, шу ерлик ўқувчилар яқинда Италияда бўлиб қайтганди; уч ўқувчида COVID-19 аниқланган.
Бу вақтда Оқ уй мамлакатда коронавирусни аниқлаш учун зарур бўлган тиббий қурилмалар етишмовчилиги мавжудлигини тан олмоқда.
Вице-президент Майк Пенс ҳукумат бу ҳафтада 1 млн дона диагностик қурилмалар етказиб бериш бўйича ваъдасини бажара олмаслигини билдирган.
АҚШда 14 киши коронавирус қурбони бўлган, беморларнинг жами сони 233 киши.
Starbucks кўп марталик кружкалардан воз кечди
GETTY IMAGES
Starbucks тармоғи кўп марта ишлатиладиган кружкалардан фойдаланишни вақтинчаликка тўхтатди.
Starbucks маъмуриятининг таъкидлашича, идишини ўзи билан олиб келадиган мижозлар учун скидкалар ўз ўрнида қолади, аммо ичимлик уларга бир марталик қоғоз стаканларда қуйиб берилади.
Британиядаги иккита темир йўл компанияси - Great Western Railway ва LNER ҳам кўп марта фойдаланиладиган идишлардан воз кечган ва бир марталик идишлардан фойдаланишга ўтган.
Озиқ-овқат етарлими?
Британия супермаркетлардаги аҳвол / AFP
Британия ҳукумати матбуотни коронавирус оммавий тарқалиб кетгудек бўлса ҳам, озиқ-овқат танқислиги юзага келмаслигига ишонтирмоқда.
Мамлакат соғлиқни сақла вазири Мэтт Ҳэнкокнинг Би-би-си мухбирига айтишича, одамлар керагидан ортиқ озиқ-овқат маҳсулотлари сотиб олмасликлари керак.
«Энг асосийси - биз супермаркетлар билан барча керакли ишларни қиламиз, агар одамлар ўзини изоляция қилишига тўғри келса, биз уларга зарур нарсаларни етказиб берамиз», - деган вазир.
Супермаркетлардан бирининг раҳбари вазирнинг сўзига изоҳ бериб, айни вақтда талаб энг кўп бўлган маҳсулотлар макаронлар, ёрмалар ва консервалар эканини қайд этиб ўтган. У ҳукумат аҳоли талабини қондира олиши ва маҳсулотларни ўз вақтида етказиб беришга улгуриши мумкинлигига шубҳа билдирган.
«Мэтт Ҳэнкок ниманидир ўйлаб қўйгандир, у «биз супермаркетлар билан биргаликда барчасини қиламиз» деди. Лекин биз ҳукуматдан бу борада ҳеч қандай гап эшитмадик», деган мамлакатдаги супермаркетлардан бирининг ижрочи директори.
Лондондаги Boots тармоғи дорихоналаридан бири бўшаб қолган / PA MEDIA
Жума куни бош вазир Борис Жонсон коронавирусдан вакцина тайёрлаш учун 46 млн фунт ажратилишини маълум қилганди. “Замин” янгиликларини “Telegram”да кузатиб боринг
Ctrl
Enter
Хато топдИнгизми?
Иборани ажратиб Ctrl+Enter тугмасини босингМавзуга оид янгиликлар
Рамзан Қодировнинг 19 ёшли қизи медаль билан тақдирланди
Crocus терактида айбланаётган тожикистонлик Далержон Мирзоевнинг ота-онаси ўғли ҳақида гапирди
ҲАМАС етакчиси: Исроил Рафаҳга кирса, Фаластин халқи оқ байроқни кўтармайди
Германиянинг Knauf компанияси Россиядан бутунлай чиқиб кетишини тасдиқлади
Эрон президенти жиддий баёнот берди: «Исроилдан ҳеч нарса қолмайди»
АҚШнинг Суриядаги ҳарбий базасига ракеталар ҳужум қилди
Футзал. Осиё Кубоги. Тожикистон Японияни гуруҳда қолдирди
Ўзбекистонда ўтган уч ойда қанча автомобиль ишлаб чиқарилган?
