15:43 / 07.12.2020
2 812

Божхоначилар 7 бош лочинларнинг яширинча олиб чиқилишини фош қилишди

Божхоначилар 7 бош лочинларнинг яширинча олиб чиқилишини фош қилишди
Республикамиз божхоначилари юртимизнинг ҳайвонот оламини асраб-авайлашда ҳам ўзларининг муносиб ҳиссаларини қўшиб келишмоқда.
Жумладан, мамлакатимизда йўқолиб бораётган жонзотларнинг божхона чегаралари орқали ноқонуний равишда олиб чиқиб кетилишининг олдини олишга қаратилган тадбирлар мунтазам давом эттирилмоқда.

Тошкент вилояти божхона бошқармаси Контрабандага қарши курашиш ва божхона аудити бўлими томонидан Давлат хавфсизлик хизмати ходимлари билан биргаликда Тошкент вилоятининг Бекобод шаҳрида тезкор тадбир ўтказилди.

Шаҳарнинг чегарадош ҳудудида ҳаракатланаётган шахс тезкор ходимлар томонидан кузатувга олинганини сезиб қолгач, шу ердаги уйлардан бирига қочиб киради ва яширинишга уринади.

Мазкур хонадон белгиланган тартибда кўздан кечирилиб, қочишга уринган шахснинг қўлидаги сумка очиб кўрилганида, унинг ичида 7 бош лочинлар борлиги аниқланди.

Ноқонуний равишда олиб ўтишда атрофдагиларга сездирмаслик мақсадида қушларнинг кўзи, оёқлари боғлаб қўйилган, қанотлари эса скотчланган. Шунингдек, улар сумкага зич ҳолатда жойлаштирилган бўлиб, бу ҳолатни қушларга нисбатан ваҳшийлик деб изоҳлаш мумкин.
Ҳозирда мазкур лочинлар Тошкент ҳайвонот боғида сақланмоқда. Келтирилган куни уларнинг 4 нафари оғир аҳвода бўлган. Ҳайвонот боғи ветеринарлари томонидан кўрсатилган муолажа ва парваришлардан сўнг уларнинг аҳволи яхшиланган.

Амалдаги тартибларга кўра, лочинларга чип ўрнатилди ва энди улар Халқаро реестрга киритилди. 90 кунлик карантин шароитидаги парваришдан сўнг лочинлар яна она-табиат қўйнига учириб юборилади.

Ўзбекистон Республикасининг 2019 йилда чоп этилган Қизил китобига “Итолғи” номи билан киритилган ушбу лочинлар асосан Ғарбий Тянь-Шан ва Ҳисор-Олой тоғ тизмалари ҳамда Қизилқум чўлида учрайди. Сўнгги ҳисоб-китобларга кўра, мамлакатимизда бу каби итолғи лочинлари кескин камайиб, ҳозирда атиги 70 жуфт сақланиб қолгани тахмин қилинади.

Лочинларни ноқонуний равишда олиб чиқишга уринган шахслар уларнинг ҳар бирининг баҳосини ўртача 30 млн. сўмдан эканлигини таъкидлашган. Ваҳоланки, дунё бўйлаб қора бозорларда лочинларнинг нархи 15 минг АҚШ долларидан 150 минг АҚШ долларигача баҳоланади. Уларнинг қўлга ўргатилганлари эса ҳаттоки бир неча миллион доллар туради.

Ҳозирда мазкур ҳолат юзасидан божхона органлари томонидан суриштирув ҳаракатлари давом эттирилмоқда.

arenda kvartira tashkent


Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Янгиликлар » Жамият » Божхоначилар 7 бош лочинларнинг яширинча олиб чиқилишини фош қилишди