Хорижий ОТМни тамомлаган ёш мутахассислар маошига қўшимча устама тўланади

Давлат хизматини ривожлантириш агентлиги хабарига кўра, президентнинг “Ёшларни ҳар томонлама қўллаб-қувватлаш ва уларнинг ижтимоий фаоллигини янада оширишга оид қўшимча чора-тадбирлар тўғрисида”ги фармонига мувофиқ, агентлик томонидан ойлик устамалар татбиқ этиладиган таълим йўналишлари, ташкилотлар рўйхати шакллантирилган ҳамда эндиликда агентлик, иш берувчи ва ёш мутахассис ўртасида 3 йилгача бўлган муддатга тузиладиган шартномага асосан, ходимнинг лавозим маошига қўшимча равишда устамалар ҳар ой тўлаб берилади.

Қўшимча устамалар тўлаб беришнинг асосий шартлари қуйидагича: юқори 500талик рўйхатига киритилган хорижий олий таълим муассасаларини 2021 йил ва келгуси йилларда тамомлаган ёш мутахассисга нисбатан татбиқ этилади; ёш мутахассис қўшимча миқдорларнинг биттасидан фойдаланиши мумкин.

Номзодларнинг ҳужжатлари давлат органлари, ташкилот ва муассасалари томонидан Давлат хизматини ривожлантириш агентлигига тақдим этилади. Тақдим қилинадиган ҳужжатлар: шартнома тузиш бўйича мурожаат хати; ёш мутахассиснинг хорижий ОТМни тамомлагани тўғрисида диплом, нострификация тўғрисида ҳужжат, меҳнат шартномаси ва ишга қабул қилинганлик тўғрисида буйруқ нусхалари; 3 нусхада иш берувчи ва ёш мутахассис томонидан имзоланган шартномалар.

Шартнома тузилган кундан бошлаб, иш берувчи ёш мутахассиснинг ҳар ойлик лавозим маошига қўшимча устамаларни тўлаб боради.