Юлдуз Турдиева илк концертига қандай тайёрланмоқда?

Ширали овоз соҳибаси Юлдуз Турдиева бир неча ўн йиллик ижодида давомида илк бор яккахон концерт дастурини мухлислари эътиборига намойиш этиш арафасида. Жонли ижрода ўтадиган концерт олдидан ОАВ вакиллари учун матбуот анжумани ўтказилиб, бир неча саволларга Юлдуз Турдиева ва Даврон Кабулов томонидан жавоб берилди.

Кўп йиллик ижод давомидаги илк концерт ҳақида

— Бир йили альбом тақдимоти қилганимда, Давронга бир қўшиғим ёқиб қолиб, “Опа, концерт беришингиз керак”, деган. Бир ой бу ҳақида ўйлаганмиз ҳам. Аммо у вақт карантинга тўғри келиб қолди. Шунда кўп телеканалларда жонли онлайн концертлар бўлди. “Халқлар дўстлиги”да тўрт мингта киши кўрса, онлайн концертни бутун Ўзбекистон кўрди” дея яна орқада қолдирдим.

Озарбайжонда, Францияда ҳар йили концерт дастури бўлади. Бу йил май ойида ҳам режалаштирганмиз. Агар бу йил ҳам Даврон “Опа, жой йўқ, вақт кам” дея туртки бермаганда, тўйлар ва бола-чақа билан бўлиб яна орқага сурилиб кетарди, дейди хонанда.

“Юлдуз опа билан келаси 10 йилдаги ижодий ҳамкормиз”

— Йиллар давомида турли сабабларга кўра Юлдуз Турдиеванинг концертини ўтказиш режаси амалга ошмай келаётганди. Орада фарзандли ҳам бўлди. Бу йил вақт тиғиз бўлишига қарамай, кичик имкон пайдо бўлиб қолганда, дарҳол ишга киришдик. Нима учун икки кун, деган саволга жавоб берсам. Ўзбекистонда концерт бизнеси яхши аҳволда эмас. Кўп касаба уюшмалари томонидан одамларнинг ойлигидан ушлаб қолиш эвазига чипта ўтказиш ҳолатлари бор. Мен бунинг биринчи навбатдаги душманиман. Ундан кўра, яхши концерт бериш керак, одамлар ўзи хоҳлаб шу концертга келсин. Иккимиз ҳам “Ўзи қайси хонанданинг концерти эди?” деган гап бўлишини хоҳламадик.

Юлдуз Турдиеванинг таланти нуқтайи назаридан 8-10 кунлик концерт ҳам кам деб ҳисоблайман. Мен Юлдуз опа билан икки йиллик ёки биргина концерт ҳақида келишмадик, балки 10 йиллик ҳамкорликни мўлжаллаётган ҳамкорлармиз. Шу сабабли келаси йилларда концерт кунларини узайтириш муаммо бўлмайди. Росмана Юлдуз Турдиева санъати ихлосмандларини бир жойга жамлаш масаласида биз очкўзлик қилолмаймиз, дейди Даврон Кабулов.

Шабнам Сурайё билан дуэт бўлиши мумкинми?

— Концертда дуэт бўлиш-бўлмаслиги ҳозирча сир. Аммо яна бир нарса, концерт тугагандан сўнггина, ия, бугун дуэт бўлмади-я, деб эсланмаса, концерт давомида бунга алоҳида эҳтиёж бўлади, деб ўйламайман. Лекин дуэт бўлмайди, деб ҳам айтолмайман.

Концертда биринчи дақиқадан охирги онигача бош қаҳрамон Юлдуз Турдиеванинг ўзи бўлишига уларнинг кучи бемалол етади. Юлдуз Турдиеванинг ичида яна бешта Юлдуз ухлаб ётибди, уларни уйғотиш керак, дейди Даврон Кабулов.

Ижодкорлар тожикистонлик Шабнам Сурайё бўлиши мумкинлигига ишора қилди.

“Бухоронинг энг зўр либосидан кияман”

— Концертда ўзбекча қўшиқлар куйлайман. Шундоқ ҳам шу пайтгача асосан бухороча, форс-тожикча қўшиқларни кўп куйлаганман. Либосларимга ҳам алоҳида эътибор қаратяпман, бухороча энг чиройли чопонларидан тиктиряпман. Бухоролик икки дизайнердан ташқари машҳур “Анор ателиэр” билан ҳам ишлаяпмиз.

Табиатдан жуда кўп нарсадан, ҳатто, қишлоқда ўсган бўлсам-да, мол-қўй, мушуклардан ҳам қўрқаман. Концерт олди қўрқув, ҳаяжон бўлиши эса табиий, дея хонанда ўз ҳолати ҳақида яширмади.

Концертга алоҳида ном танланмагани ҳақида изоҳ берилди

^{Фото: iTicket}
— Дастурга ном берилиши концертдан концертни фарқловчи бир элемент сифатида қўлланилади. Юлдуз Турдиеванинг ижодида бу илк сарҳисоб концерт. Унда алоҳида қўшиқ ёки мавзуни ажратиб кўрсатиш концерт географияси нуқтайи назаридан нотўғри бўлади. Шунда ҳам энг сара қўшиқлари имкон даражасида қўшяпмиз. Бу мухлислар эшитиб ўрганганидек эмас, бошқача талқинда намойиш этилади.

Юлдуз опа “Мана шунча қариндошимга жой керак. Мен фалончи дугонамнинг концертига борганман, унга, бунга борганман. Улар ҳам меникига келиши керак, жой топиб беринг” деб тинмаяпти. Қариндошларингизга концерт қўйяпсизми ҳам дедим. Уларни қийнаётган энг катта муаммо шу (кулиб). Лекин бундай вазиятларда энг аввало, шу яқин инсонлар тушуниши керак деб ўйлайман, дейди Даврон Кабулов.

“Фонограммадан фойдаланилган уятли вазиятлар бўлади”

— Ҳукуматнинг концерт-томоша тадбирларида фонограммадан фойдаланиш босқичма-босқич чекланиши ҳақидаги қарордан хурсанд бўлдим.

Жон бор, жонли куйлаш керак-да. Шахсан ўзим, фонограммада айтишдан қўрқаман. Унда жуда кўп уялтирадиган вазиятлар бўлади. Ўзимда ҳам иккита давлат тадбирида шундай ҳолат бўлган — компьютердан овозимни йўғонлаштириб юборишган. “Халқ артисти” ёки “Хизмат кўрсатган артист” унвонлари бекорга берилмаган. Уни оқлай олиш ҳам керак. Жонимиз борми, жонли айтиш лозим, дейди Юлдуз Турдиева. «Замин»ни Telegram’да ўқинг!