"Энг меҳрибон судя” номи билан танилган Франк Каприо вафот этди

АҚШда машҳур “Американинг энг меҳрибон судяси” сифатида танилган судя Френк Каприо 88 ёшида ошқозон ости бези саратони билан курашиб вафот этди.

Каприо деярли 40 йил давомида судя сифатида фаолият юритди. У оддий суд жараёнларини инсонпарварлик ва ҳазил аралаш қарорлари билан машҳур қилди.

У бошқарган “Caught in Providence” номли кўрсатув бутун дунё бўйлаб машҳурликка эришди. Дастур миллиардлаб томоша қилиниб, YouTube'да 3 миллионга яқин обуначи йиғди.

Каприонинг майда ҳуқуқбузарликларни кечириш, жарималарни юмшоқ оҳангда изоҳлаш ва одамлар билан самимий муомала қилиши адолатнинг фақат қонун эмас, балки меҳр-муҳаббат орқали ҳам қарор топишини эслатиб турарди. У ҳатто ҳаётининг сўнгги кунларида ҳам касалхонадан туриб мухлисларидан дуолар сўради.

Род-Айленд штати губернатори уни “ҳақиқий миллий бойлик” деб атади. Штат бўйлаб байроқлар ярим устунда ҳилпиратилиб, судянинг хотираси шарафланмоқда. Френк Каприо инсонийлик, камтарлик ва хизмат тимсоли сифатида ёдда қолади.