Мадриддан Гранадага олиб кетилаётган Пабло Пикассонинг 1921 йилда яратилган “Гитара билан натюрморт” номли асари ғойиб бўлди. Бу ҳақда Euronews хабар берди.
Маълумотларга кўра, гуаш услубида чизилган ушбу асар CajaGranada фондида ташкил этилган «Натюрморт. La eternidad de lo inerte» кўргазмасида намойиш этилиши керак эди. Бироқ ўлчами 12,7х9 сантиметр бўлган бу кичик асар ўз манзилига етиб бормаган.
Расм Мадриддаги Пио XII қароргоҳидан санъат асарларини ташиш бўйича ихтисослашган компания томонидан етказилган. Асар 25 сентябрда бошқа картиналар билан бирга омборга жойлаштирилган ва кейин Гранадага йўл олган.
Кўргазма 2 октябрда очилган, асарлар эса 3 октябрда соат 10:00 да маданият марказига етказилган. Шу кечаси картиналар Дейфонтес шаҳрида бўлган. Терговчиларнинг тахминларича, айнан шу ҳудудда Пикассонинг асари ўғирланган бўлиши мумкин.
10 октябр куни CajaGranada фонди полицияга расмий шикоят йўллаганидан сўнг, Миллий полициянинг тарихий мерос бригадаси терговни бошлаган.
Ҳозирча расмнинг қаердалиги номаълум ва ҳеч ким қўлга олинмаган. Тергов ишлари давом этмоқда.
“Zamin”ни Telegram'да ўқинг!
