Машҳур қўшиқчи Дуа Липа Samsung компаниясига қарши судга мурожаат қилди. The Guardian нашрининг хабар беришича, санъаткор компаниядан камида 15 миллион доллар талаб қилмоқда.
Хонанданинг таъкидлашича, Samsung унинг суратидан рухсатсиз тарзда телевизорлар рекламасида фойдаланган. Маълум бўлишича, 2025 йилда АҚШда сотилган айрим телевизорлар қутисида Дуа Липа тасвири жойлаштирилган.
Даъво аризасида қайд этилишича, мазкур сурат 2024 йилда Austin City Limits фестивали ортида олинган бўлиб, унга бўлган ҳуқуқ қўшиқчининг ўзига тегишли ҳисобланади. Дуа Липа эса ҳеч қачон Samsung рекламасида қатнашишга розилик бермаганини билдирган.
Хонанда компанияни муаллифлик ҳуқуқини бузиш, унинг образидан ноқонуний фойдаланиш ва бренд билан ҳамкорлик қилаётгандек нотўғри тасаввур уйғотишда айбламоқда. Шунингдек, Samsung машҳур санъаткорнинг оммабоплиги орқали тижорий фойда кўришга урингани ҳам айтилган.
Дуа Липанинг адвокатлари қўшиқчи реклама ҳамкорликларига жуда эҳтиёткорлик билан ёндашишини таъкидлаган. Унинг фақат Apple, Porsche, Versace, Bvlgari ва Nespresso каби йирик брендлар билан ҳамкорлик қилиб келаётгани маълум қилинган.
“Zamin”ни Telegram'да ўқинг!
