18:30 / 03.05.2018
6 671

Дилдора Ниёзованинг 12 та ноодатий саволга жавоби

Дилдора Ниёзованинг 12 та ноодатий саволга жавоби
Ҳар ойда янги қўшиқ куйламаса ҳам, бу хонандага тингловчилари вафодор. Қўшиқларидаги маъно, халқчилик хонанда ва мухлисни бирлаштириб туради, назаримизда. Саҳифамиз қаҳрамонига берилган кутилмаган саволлар орқали унинг дунёси билан яқинроқ танишамиз...

— Ноодатий селфи суратга тушиш учун ўзингизга яқин бўлган ҳолатни танланг: тезликда юриб кетаётган поезд вагонининг тепасига чиқиш; ўттиз қаватли бино томида; шер билан бир қафасда.
— Поезд вагонининг тепасига чиққан бўлардим. Бу қайсидир маънода феълим билан боғлиқ. Ҳаётда ҳам ҳаракатда бўлишни, тезликни ёқтираман.

— Ўзингиздаги қайси хислатни дугоналарингизга ўрнак сифатида кўрсата оласиз?
— Сабр билан ҳамма нарсага эришиш мумкинлигини ўзим учун исботлаганман. Дугоналаримга ҳам доим сабр қилиш кераклиги ҳақида айтаман.

— Жульетта ролини ижро этиш таклифи тушди...
— Агар ёшроқ бўлганимда ҳеч иккиланмасдан рози бўлар эдим. Лекин бугун ёшим, кўринишим бу ролга тўғри келмайди.

— Ташқи кўринишингизда нимани ўзгартирган бўлардингиз?
— Ҳеч нарсани. Доим ўзимни шундай кўринишда қабул қилиб келганман. Шунинг учун тубдан ўзгариш мен учун эмас.

— Ўзингизга қайси саволни кўп берасиз?
— Бахтлиманми? Нега билмадим, лекин миямда мана шу савол кўп такрорланади. Ҳар сафар ижобий жавоб олганман (кулади). Шукр, яқинларим соғ-саломат, турмуш ўртоғим ёнимда, фарзандларим бор. Нолишга ўрин йўқ.

— Дунёга машҳур қайси инсоннинг ҳаётида бир кун яшаб кўришни истардингиз?
— Ёшлигимдан бир машҳур инсон кумирим эди. Вақтлар давомида унинг ижодидан ташқари ҳаётидан бохабар бўлиб бироз ҳурмат қилмай қўйдим. Санъаткорнинг шахсий ҳаётига эмас, ижодига қизиқиш керак, деб бекорга айтишмас экан.

— Бир жамадон пул беришса...
— Ижод қилишни яхши кўраман. Аммо баъзида имкониятларим бироз тўсқинлик қилиб туради. Агар қўлимга катта пул тушса, кў-ў-ўп қўшиқ ёзиб, маза қилиб клип суратга олдирардим.

— Турмуш ўртоғингиз одатда нега рашк қилади?
— Бўлар-бўлмасга қизғанадиган одатлари йўқ. Лекин бироз калта кўйлак кийсам, жаҳллари чиқиб, гапириб қўядилар.

— Кўринмас одамга айланиб қолсангиз...
— Бутун дунёни айланиб чиққан бўлардим, текинга (кулади). Лекин ҳеч ким билан гаплашолмай, зерикиб қолишим мумкин-ку... Яхшилаб ўйлаб кўришим керак экан.

— Тушингиз ўнгидан келганми?
— Бундай ҳолат жуда кўп бўлади. Масалан, тўйимдан олдин, эрим билан қўл ушлашиб, узоқ йўлга чиққанимни туш кўргандим. Ўшанда уйғониб шу йигитга турмушга чиқсам керак, деган хаёл ўтганди.

— «Гиннес рекордлар китоби»га кириш имкони берилганида, қайси йўналишни танлаган бўлардингиз?
— Миллиардер бўлганимда, дунёда энг кўп яхшилик қилган Дилдора Ниёзова сифатида бу китобда қайд этилишни истардим.

— Қачон охирги маротаба ота-онангизга уларни яхши кўришингизни айтдингиз?
— Бу гапни жуда тез такрорлайман. Бундан уч кун аввал уйга боргандим, ўшанда ҳам шу сўзларни айтиб хайрлашдим. Ота-оналаримиз доим соғ бўлишсин!
Алия СУЛАЙМАНОВА

Манба: Darakchi.uz

Dasturlash foundation


Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Янгиликлар » Маданият » Дилдора Ниёзованинг 12 та ноодатий саволга жавоби