Севара Назархоннинг «2019» альбоми тақдимоти бўлиб ўтди (фото)

Йиллар давомида ижод йўли ва тароналари катта-ю кичикни бирдек ўзига ром этиб келаётган Севара Назархон дўстлари, ҳамкасблари ва шунчаки ижоди шайдоларини бир ерга тўплаб, янги мусиқий тўпламини тақдим этди.

Оддийлик ва самимийликни хуш кўрувчи хонанда, альбомини оддийгина қилиб «2019» деб номлаган ва ундан 11та тарона жой олган. Альбомда «Биларсан», «Магар», «Севилмоқ», «Илтижо», «Изҳори ишқ» ва бошқа янги сокин руҳдаги қўшиқларни тинглаш мумкин.

Севара Назархон:
«Мазкур тўплам устида жамоамиз билан бир неча йил иш олиб борганмиз. Бобур Бобомурод, Усмон Азим ва бошқа шоирлар қаламига мансуб шеърларга мурожаат этилган. Ҳар бир қўшиқ ўзининг чуқур маъносига эга. Альбомни эса оддий «2019» деб номлашга қарор қилдим. Альбом яратилишида мусиқий сайқал устида ишлаган Марат Мақсудийнинг ва овоз оператори Дмитрий Куликовнинг роли катта. Ундан ташқари, нафақат альбом яратилишида ёрдам берган, балки яқин дўстим ҳам бўлган Макс Пенсонни ҳам айтиб ўтиш жоиз».

Hyatt Regency Tashkent меҳмонхонасига тўпланган меҳмонлар тақдимотдан аввал бир-бирлари билан дийдорлашиб, тортиқ этилган фуршетдан баҳраманд бўлиб, мулоқот қилишга муваффақ бўлдилар.

Карен Ғофуржонов эса меҳмонлар орасида викторина ўтказиб, Севара Назархон ижоди билан боғлиқ саволларни берди ва хонанданинг ҳақиқий мухлислари альбом муқоваси принти туширлган футболкаларни қўлга киритишди. alt

Альбом тақдимоти «Кунлар» қўшиғи билан бошланди, экранда эса хонанда иштирокидаги видеолавҳа намойиш этилди. Намойиш этилган видеолавҳада машҳур ўзбек рассоми Бобур Исмоиловнинг яратган ишларини ҳам кўриш мумкин бўлди. Катта экран ортида Назархон сояси ва рақси кўринди. «Тошкент зеболари» рақси билан давом этди.

Саҳнада Нурмуҳаммад Исроилов ва Муслимбек Йўлдошевлар томонидан куйга бағишланган монологлар ўқилди.
Эл суйган санъаткор - Севара: «Қўшиқ ҳақида, қўшиқнинг ўзидан эшитсак, унинг қўшиқларидан...», сўзлари остида мухлислари қаршисига чиқди.

Севара ижросида жаранг сочган илк тарона, Бобур Бобомурод шеъри билан яратилган, «Менга ҳам ўргатинг» қўшиғи бўлди.

Бобур Бобомурод, шоир
«Севара бугунги кечада яна бир бор ўзига хослигини исботлади. Шундай тақдимотларни ўтказиш мумкинлигини ва кераклигини бугун кўрсатиб берди. Севара ёш бўлишига қарамай, миллий бойлигимизга айланишга улгурди, десак муболаға бўлмайди. У биз фахрланадиган, фахр билан тилга оладиган санъаткоримиз. Мен Севара билан ижодда доим ҳамфикр бўлиб келганимиздан мамнунман».

Альбомдан ўрин олган янги қўшиқларни кетма-кет куйлар экан, залда йиғилганлар билан саломлашиб, кеча давомида улар билан мулоқат қилишни унутмади.

Қўшиқлар орасидаги танаффусларда эса альбом ҳақида, ижодий гуруҳ ҳақида гапириб, уларга миннатдорчилик билдирди.


Шу куни хонанда навбатдаги янги альбом устида ҳам иш бошлаб юборганини ва у рақсбопроқ бўлиши ҳақида маълум қилди.

Кеча, тингловчиларнинг севимли тароналаридан бири - «Юр муҳаббат» таронаси билан якунланди. Ушбу қўшиқни хонанда залдаги барча меҳмонлар билан бирга куйлади.

Хонанданинг қўшиқлари, йўналишлари доимо ўзига хослиги билан ажралиб турган ва буни яна бир бор Севара Назархон тақдимотда исботлади. Тақдимот бир нафасда, жуда ҳам тез ўтиб кетди. Ташриф буюрган меҳмонлар шу куни Севаранинг ўзгача дунёси ва коинотига саёҳат қилдилар. Айтиш жоизки, тақдимот бир нафасда ўтиб кетди ва бу кичик концерт дастури сифатида тақдим этилган альбом тақдимоти хонанданинг тингловчиларига камлик қилди.
Даврон Кабулов, шоумен
«Севара Назархон сокинлик билан, ўзининг маъсумалиги билан миллионлаб қалбларни забт этган. Умид қиламиз-ки, бугунги тақдим этилган ижод маҳсуллари ҳам ўз тингловчисини топади ва ҳар бир тингловчи қалбининг туб-тубига етиб боради. Севара мухлисларини доимо хурсанд этиб юришларига тилакдошман».
Азиз Раметов, актёр
«Севара Назархон ўз тингловчисига кутилмаган ижод намунасини кўрсатадиган ижодкор. Унинг қўшиқларидан руҳан завқланасиз».

Ташриф буюрган меҳмонлар орасида Фатхулла Маъсудов, Ёқуб Ахмедов, Жаҳонгир Отажонов, Озода Нурсаидова, Лола Элтоева, Рихситилла Ибрагимов, Шаҳзода, Нилуфар Усмонова, Шаҳзода Матчонова, Алишер Узоқов, Бобур Йўлдошев, Райҳон, Умидахон, Зебо Наврўзова, Сетора гуруҳи аъзолари, Манзура, Уммон гуруҳи, Афрузгуруҳи, Азиз Ражабий, Шахрам Ғиёсов ва кўпгина бошқа таниқли шахсларни кўриш мумкин бўлди.





“Замин” янгиликларини “Одноклассники”да кузатиб боринг