Рўзиқул Бердиев: "Дастлабки 10 дақиқа биз учун жуда ёмон кечди. Шундан сўнг ўйин "Навбаҳор"нинг режаси бўйича кетди"

Суперлиганинг 14-туридан ўрин олган "Насаф" - "Навбаҳор" (0:1) учрашувидан сўнг, мезбонлар бош мураббийи Рўзиқул Бердиев матбуот анжуманида қатнашди.

Ўйин ҳақида
- Ўйинни ёмон бошладик. Дастлабки 10 дақиқа биз учун жуда ёмон кечди ва гол ўтказиб юбордик. Шундан сўнг ўйин "Навбаҳор"нинг режаси бўйича кетди. Иккинчи бўлимда анча ташаббусга эга бўлдик. Тезликда ҳам, ҳужумда ҳам фаол бўлдик. Аммо голга тортадиган вазиятлар бўлмади. Бунга "Навбаҳор" жамоасининг яхши ҳимоялангани сабаб бўлди.

- Легионер ўйинчиларни нега ўйин бошидан майдонга туширмадингиз?
- Улар ҳали бизнинг жамоани тўлиқ ўрганганлари йўқ. Легионерлар машғулотларда керакли юкламаларни олмоқда. Бундан ташқари улар жисмоний тарафдан ҳам ҳали тўлиқ тайёр эмаслар. Шу сабаб ҳам легионерларни ўйин бошида захирада қолдирдим.

- Йил бошида "Пахтакор"га қарши учта марказий ҳимоячи билан ўйнадингиз. Бугун эса тўртта ҳимоячи билан ўйнадингиз. Сизнинг наздингизда ҳозирги "Навбаҳор" мавсум аввалидаги "Пахтакор"дан кучлироқми? Нега таваккал қилиб кўрмадингиз?
- Йўқ, биз икки схемада ҳам ўйнаймиз. Аввалги ўйинларда учта ҳимоячи билан ўйнашимизга Шерзод Насруллаевнинг жароҳати сабаб бўлган. Биз вазиятдан келиб чиқиб учта ҳимоячи билан ўйнаганмиз. Умуман жамоамизнинг асосий тактик схемаси 4-3-3 ҳисобланади. Шу сабаб ҳам бугунги ўйинга айнан шундай схема танланди.

- Лекин ўйинни сақлаб қолиш учун учрашувнинг сўнгги 20-25 дақиқасида таваккал қилдингиз. Балки, ўйин аввалида шундай тактика танлаганингизда "Навбаҳор" бу каби кескин ҳужумлар ташкил қила олмаган бўлармиди?
- Йўқ, менимча. Ўйин охирида таваккал қилдик. Лекин вазиятлар яратишда жуда оқсадик. Буни ўзингиз ҳам кўрдингиз. Аммо йигитларга бу ўйин учун раҳмат деб қоламан. Улар охиригача курашишди. Ҳеч бўлмаса дуранг учун курашишди. Лекин камчиликлар бўлди. Буни бартараф этиш учун биргаликда ҳаракат қиламиз.

- Охирги марта "Насаф" ўйинчиларининг техник хатоларга бунчалик кўп йўл қўйганларини тўғриси эслолмадим. Бу нима билан боғлиқ? Ўйин давомида "Насаф" футболчилари жуда кўп техник хатоликларга йўл қўйишди...
- Бу албатта ҳаяжон билан боғлиқ. Айнан ҳаяжон сабаб йигитларнинг ўйинга бўлган тайёргарликлари ошиб кетгандир. Шунинг учун ўйинни жуда асабий бошладик. Баъзи ўйинчиларда бу нарса ўйиннинг охиригача давом этди.

- "Навбаҳор" ушбу мавсум олий мақсадни ўз олдига қўйган. Нима деб ўйлайсиз "Навбаҳор" ушбу мавсум ОЧЛ йўлланмасини қўлга кирита оладими?
- ОЧЛ йўлланмасини қўлга киритиш учун чемпионат, кубок ўйинлари бор. Бир нарсани аниқ айта оламанки, ушбу мавсум чемпионлик учун ҳам, ОЧЛ йўлланмалари учун ҳам охиргача кураш бўлади. Сабаби, бу йил бир неча жамоаларнинг савияси бир хил даражада. "Навбаҳор" ҳам бу рўйхатда бор, албатта. Аммо айнан бир жамоани алоҳида кўрсатмайман. Бу йил кўпчилик ўртасида кураш кечади. “Замин” янгиликларини “Facebook”да кузатиб боринг