Дин Лижен Қозоғистоннинг Остона шаҳри мезбонлик қилган шахмат тожи учун кечган ўйинларда Ян Непомняшийни енгиб, жаҳон чемпионига айланди.
Хитойлик ва россиялик гроссмейстер ўртасидаги 14 партиядан иборат қарама-қаршиликда 7:7 ҳисоби қайд этилди. Тай-брейкда Лижен 2,5:1,5 ҳисобида ғалаба қозонди.
Шахмат бўйича жаҳон чемпиони мақоми 1886 йилдан бери тақдим этилади. Лижен ушбу мақомга эга чиққан тарихдаги 17-шахматчи ва илк хитойлик бўлди.
Бунга қадар чемпионликни қўлга киритган шахматчилар: Александр Алёхин, Михаил Ботвинник, Василий Смислов, Михаил Тал, Тигран Петросян, Борис Спасский, Анатолий Карпов, Гарри Каспаров, Владимир Крамник (барчаси СССР, Россия), Вилгелм Стейниц (Австрия), Эмануил Ласкер (Германия), Хосе Рауль Капабланка (Коста-Рика), Макс Эйве (Нидерландия), Роберт Фишер (АҚШ), Вишванатан Ананд (Ҳиндистон), Магнус Карлсен (Норвегия).
Қайд этиш керак, 1993—2006 йиллар мобайнида жаҳон чемпиони мақоми иккита версия бўйича аниқланган: FIDE ва PCA. 2004 йилда ўзбекистонлик шахматчи Рустам Қосимжонов FIDE талқини бўйича шахмат тожига эга чиққанди.
Аслида шахмат тожи учун беллашувлар амалдаги чемпион ва даъвогарлар мусобақаси ғолиби ўртасида кечади. Бироқ 2013—2023 йиллар мобайнида жаҳон чемпиони мақомини сақлаб турган Магнус Карлсен навбатдаги ҳимоя ўйинида қатнашмаслигини маълум қилганди. Шу боис даъвогарлар мусобақасида 1 ва 2-ўринни қўлга киритган Непомняший ва Лижен шахмат тожи учун кураш олиб борди.
“Замин” янгиликларини “Youtube”да кузатиб боринг
