Coca Cola Суперлигасининг 9-туридан ўрин олган "Бунёдкор" — "Олимпик" учрашувидан сўнг меҳмонлар бош мураббийи Тимур Кападзе матбуот анжуманида иштирок этди.
Ўйин ҳақида
- Ўйин қизиқарли руҳда бўлди. Биз ғалабага яқинроқ эдик. Иккала жамоа ҳам яхши ҳаракат қилди. Ўйин курашларга бой бўлди. Йўл қўйган хатоларимиз устида ишлаймиз.
- "Олимпик" биринчи бўлимни яхши бошлаб, гол ҳам урди. Иккинчи бўлимда эса буткул ўзгарди, заҳирадан майдонга тушган ўйинчилар учрашув темпини пасайтириб юборди.
- Биринчи бўлимни яхши бошладик. Ҳакам баъзи вазиятларда яхши қарор чиқарса бўларди. Қайсидир вазиятда рақиб футболчисига сариқ карточка кўрсатса бўларди. Иккинчи бўлимда чарчоқ аломати сезилди. Ўзгаришларни эртароқ қилишимиз керак эди. Бироқ вазиятлар учун куч топа олдик. Рақибда икки таймда ҳам вазият юзага келди. Менимча, дуранг ўйинга мос бўлди. Бунақа ўйин темпига тушиш қийинчилик туғдиради. Иккинчи бўлимда қаршилик етарлича бўлди.
- Жамоа сўнгги 6 та учрашувда 3 та гол урди. Бу жамоанинг муаммосими?
- Машғулот жараёнларида ушбу жиҳат устида иш олиб бормоқдамиз. Ҳужумчи бир нечта ўйинда гол урмаса, ўзига бўлган ишончни йўқотади ва гол уришга бир оз қийналади. Ушбу ҳолатни тўғрилаймиз ва ушбу масалани ҳал қилиш бўйича иш олиб бормоқдамиз. Авваллари ўйинларда 2-3та гол урардик. Ҳозир бу борада муаммога дуч келмоқдамиз.
- Руслан Жияновнинг жисмоний ҳолати ҳақида нима дея оласиз?
- Ҳа, муаммо бор. Лекин мен унга совуққонлик етишмаётганини сезяпман. У тактик, техник, жисмоний жиҳатдан ҳам кучли футболчи. Ҳали у ўз ҳолатини яхшилашига ишонаман. Бундай муаммо бутун ҳужум чизиғидаги футболчиларда мавжуд.
- Футболчилар "Бунёдкор" ўйинчилари томонидан "провокация"га учраши мумкин эди. Ушбу ҳолат юзасидан футболчилар билан ўйин аввалида гаплашиб олганмидингиз?
- Биз "Бунёдкор" жамоаси ўйинини таҳлил қилиб чиқдик. Мавсум бошиданоқ йигитларимиз кўп қизил карточкалар олишди ва етарлича хулоса чиқаришди деб ўйлайман. Бундай вазиятларда йигитлар ўзини совуққон тутиши керак. Биринчи навбатда, қизил карточка футболчиларга зарар, улар ўйинни ўтказиб юборади ва жамоани оғир аҳволга солиб қўяди. Олимпия терма жамоасига жалб этиладиган футболчиларга буни уқтирганман. Футболчи ўзини жиловлай олмаса, уни терма жамоага чақирмайман. Сабаби, муҳим ўйинда у провокацияга учраб, майдондан четлатилиши мумкин. Шогирдларим бундан хабардор.
- "Олимпик" посбонидан кўнглингиз тўляптими?
- Мен ўтказиб юборилган голни кўрмадим. Ҳимоячимиз ўша вазиятда хато қилди, менимча. Умуман олганда, бу нормал ҳолат. Ҳали шогирдларим тажрибага эга бўлиши керак. Улар ривожланиб бормоқда. Бизнинг вазифамиз уларга имконият бериш. Бугун раҳбарият ва меҳмонлар ҳам ташриф буюрганди. Бундай босим остида ўйнаш осон эмас.
Оқил Абдубарноев ёзиб олди.
“Замин” янгиликларини “Telegram”да кузатиб боринг
