Цукерберг Маск билан жанг қилиш фикридан қайтди

Меtа бош директори Марк Цукерберг Илон Маск билан қафасда жанг қилиш фикридан қайтганини айтди. Унинг сўзларига кўра, Twitter раҳбари ўзини жиддий тутмаяпти.

Июнь ойида Маск “қафасда жанг қилишга тайёрман” деб Twitter’да ёзганидан кейин, миллиардерлар жангга келишиб олганди. Цукерберг Маскнинг чақирувига жавобан, кураш “жойини юборишни” сўраган.

Бироқ 13 август куни Цукерберг Илон “жиддий эмас”лигини айтди.

“Мен реал санани таклиф қилдим. Дана Уайт хайрия тўплаш мақсадида курашишни таклиф қилди. Илон қачондир реал сана ва расмий тадбир ҳақида жиддий гапирса, мен билан қандай боғланишни билади. Акс ҳолда, ишларни давом эттириш вақти келди. Мен бор эътиборимни ушбу турдаги спортга жиддий ёндашадиганлар билан беллашишга қаратмоқчиман”, — деб ёзди Цукерберг янги Threads ижтимоий тармоғида.

Аввалроқ Илон Маск жангни Италиядаги “антик жойда” ўтказишни таклиф қилганди. У Италия бош вазири Гиоргиа Мелони билан бу ҳақда гаплашганини айтди.

Марк Цукерберг аралаш яккакураш билан шуғулланади. 2023 йил бошида у жиу-жицу йўналиши бўйича биринчи турнирини якунлаганини ёзганди.

Илон Маск эса ўтган ҳафтада оғирлик кўтариш орқали жангга тайёрланаётганини айтган.

Янгиликлар