ЖЧ-2026 2-саралаш босқичи Туркманистон - Ўзбекистон (1:3) учрашувидан сўнг терма жамоамиз бош мураббийи Сречко Катанец ва "Фатих Карагюмрюк" футболчиси Отабек Шукуров матбуот анжуманида иштирок этишди.
- Биз ғалабага лойиқ эдик. Мен йигитларим намойиш этган ўйиндан кўнглим тўлди. Бугунги учрашув биз учун жуда катта аҳамиятга эга эди. Агар бугун ғалаба қозона олмаганимизда кейинги учрашувга қадар катта босим бўларди, деб ўйлайман. Туркманистон терма жамоаси битта зарба бериб ҳисобни очди. Натижа мени қониқтирди.
- Нима сабабдан ғалаба қозондик? Биз Туркманистон терма жамоасига тинимсиз босим қилдик. Рақибга нисбатан кўпроқ ҳужум қилдик. Менинг жамоамнинг даражаси ҳам яхшироқ. Майдон даҳшатли ҳолатда эди. Мен бундай майдонда футбол ўйнашни тасаввур қила олмайман. Туркманистон терма жамоаси эса бундай майдонда ҳар доим ўйнайди ва улар учун бу нормал ҳолат. Менинг футболчиларим эса сунъий қопламада бир йилда бир маротаба ўйнаши мумкин. Сунъий майдонда тўп бошқача ҳаракатланади. Ўйин тезлиги тушади, тўпнинг сапчиши ҳам бошқача. Ўзбекистондан кучли терма жамоалар ҳам бундай майдонларда мағлуб бўлиши мумкин. Сунъий майдонда ҳимоявий ўйин намойиш этиш анча осон. ЖЧ-2018 саралашида ҳам КҲДРга сунъий майдонда ўйнаб ютқазганмиз. ЖЧ-2022 саралашида ҳам Фаластинга мағлуб бўлганмиз. Яна ўша сунъий майдон бизга тўсқинлик қилганди. Ўйиндан аввал йигитларга биз рақибдан кучлироқ эканлигимизни, аммо биз буни майдонда яна бир исботлашимиз кераклигини айтгандим.
Отабек Шукуров: - Ғалаба қозонганимиздан хурсандмиз. Бундай майдонда ўйнаш осон эмас. Биз характер намойиш этдик. Бош мураббий айтиб ўтганларидек, аввалги саралаш босқичларини мағлубият билан бошлаганимизга айнан сунъий майдон сабабчи бўлган. Бундай майдонда футбол ўйнашнинг имкони йўқ. Бунга жавобгар ташкилот, футболчининг соғлигини ҳам ўйлаши керак. Бу муҳим учрашув эди ва бундай муҳим учрашувларни табиий майдонда ўтказиш керак. Шунда ҳақиқий футбол бўлади.
- Биз тикланиб олишимиз керак. Бундай ҳолатда Эронга қарши ўйнай олмаймиз. Бизга вақт керак. Ҳали олдинда 5 кун бор. Туркманистонга қарши ўйиндан аввал мен машғулот ўтказмадим. Эрон терма жамоаси жуда тажрибали, аммо Эронга қарши қандай ўйнаш кераклигини биламан. Эрон терма жамоаси билан уч марта тўқнаш келганман ва 1та ғалаба ва 1та дуранг қайд этганман.
- Бугун иккита гол урдингиз. Голларингизни кимга бағишладингиз?
Отабек Шукуров: Голни дадамга бағишлайман.
Сречко Катанец: - Мен бугун хато қилибман. Отабек ҳужумда "девятка" бўлиб ўйнаши керак эди(кулади).
“Замин” янгиликларини “Telegram”да кузатиб боринг
