Всеволод Шумков Миразизбек Мирзаҳалилов учун қандай рақиб? Боксчимизнинг жавоби...

Маълумки, боксчимиз Миразизбек Мирзахалилов 16 февраль куни Тожикистон пойтахти Душанбе шаҳри мезбонлик қилган IBA Champions Night оқшомида IBA чемпионлик камари учун Мексика вакили, ҳали мағлубиятга учрамаган Луис Родригесга қарши жанг қилди ва ажойиб ғалабага эришганди.

Энди, у финалда россиялик Всеволод Шумковга қарши рингга кўтариладиган бўлди. Биз ушбу жанг ҳақида Миразизбек Мирзаҳалиловни фикрлари билан қизиқдик.

- Миразизбек аввало, таваллуд айёмингиз билан ва элиминатор жангидаги ғалабангиз билан табриклаймиз!
- Раҳмат.

- Аввалги жангингиздаги рақибингиз мексикалик боксчи сизни қайси жиҳати билан ҳайрон қолдирди?
- Одатда, мексикаликларнинг жағи бақувват бўлади, тана қисмига эса зарбани кўтара олмайди, дейишарди. Бироқ, менинг рақибимни функционал тайёргарлиги жуда яхши экан. Нафақат бош қисмига балки танага йўлланган зарбаларни ҳам кўтара оладиган даражада чидамли экан. Шу томони билан менда яхши таассурот қолдирди.

- Навбатдаги рақибингиз ҳам аниқ бўлди. Всеволод Шумков ҳақида қандай таассуротга эгасиз?
- Яхши биламан. Россиянинг энг савияли боксчиларидан бири ҳисобланади. Яхши натижалар қайд этган. Ёмон рақиб эмас.

- Янглишмасам, фаолиятингизда у билан тўқнаш келмагансиз?
- Йўқ. У билан мусобақаларда тўғри келмаганмиз. Лекин қўшма машғулотлар жараёнида спаррингларда ишлаганмиз.

- Демак, уни яхши биласиз?
- Шундай десам ҳам бўлади.

- У сиз учун қандай рақиб?
- Ўйлайманки, у қадар жиддий рақиб бўлади, деб ўйламайман. Сабаби, унинг камчиликлари жуда кўп. Насиб қилса, чиройли тарзда ғалаба қозонишга ҳаракат қиламиз.

- Бу борада сизга омад тилаймиз!
- Эътибор учун хурсандман! “Замин” янгиликларини “Telegram”да кузатиб боринг