Илёс Зейтуллаев: "Бугунги дуранг биз учун ғалабага тенг"

Суперлиганинг 7-туридан ўрин олган "Насаф" - "Бунёдкор" (0:0) учрашувидан сўнг меҳмонлар бош мураббийи Илёс Зейтуллаев матбуот анжуманида иштирок этди.

Ўйин ҳақида
- Оғир учрашув, кучли рақибга қарши босимларга бой ўтган ўйин. Бугун йигитлар ўзларини нимага қодир эканликларини исботлаш учун ҳам ҳаракат қилишди. "Бунёдкор" сўнги ўринларда юрадиган жамоа эмас, биз бу вазифани босқичма-босқич уддалашимизга ишонамиз. Бугунги ўйин учун йигитларга миннатдорчилик билдираман.

- Жамоангиз биринчи бўлимда ҳужумкор футбол кўрсатди. Иккинчи бўлимда эса иккинчи рақамли жамоа сифатида ўйнади. Бу қизил карточка туфайлими?
- Мен мураббий сифатида натижани ҳоҳлайман. Кучли рақибга қарши 10 киши бўлиб ўйнаш осон эмас, қизил карточкадан сўнг ҳимояга эътибор қаратдик. Мезбонларга имкон қадар бўш худуд қолдирмасликка интилдик.

- "Насаф" намойиш этган ўйин ҳақида фикрингиз?
- "Насаф" жуда кучли жамоа. Клубда энг яхшилардан бўлган мураббийлар штаби ишлайди. Ҳужумкор, курашувчан ва зўр жамоа.

- Битта ғалаба жамоада нималарни ўзгартириб юборади?
- Бугунги дуранг биз учун ғалабага тенг. Шу каби кучли клублар билан ўйинда очко қўлга киритилиши жамоа руҳиятини кўтаришга, йигитларда ўзларига бўлган ишончни оширишга хизмат қилади.

- Италия футболидан қандай тактик услубларни жамоага олиб кирмоқчисиз?
- Суперлигада кучли футболчилар ўйнайди. Чемпионат даражаси ҳам юқори даражада. Ғалаба қозониш учун метин ҳимоя керак. Италия футболи ҳимоя чизиғи билан ном қозонган. Жамоага ҳужумкор ўйин билан бир навбатда темир ҳимояни ҳам олиб кирмоқчимиз. «Замин» янгиликларини «Вконтакти»да кузатиб боринг