Россия Премьер-лигасининг 10-туридан ўрин олган ЦСКА ва “Ахмат” жамоалари учрашувида ўйин қаҳрамони Аббосбек Файзуллаев бўлди.
Беллашувнинг дастлабки дақиқаларида “армиячилар”нинг ўнг қанот ҳужумчиси Рифат Жемалетдинов жароҳат олиб майдонни тарк этганидан кейин Файзуллаев чап қанотни Тамерлан Мусаевга қолдириб, ўзи ўнг қанотга кўчиб ўтди.
Бош мураббий Марко Николичнинг бу кўрсатмаси легионеримизнинг универсал ўйинчи экани ва ҳужум чизиғининг исталган нуқтасида ўйнай олиши билан изоҳланади.
Аббосбек ўнг томонда ҳам фаол ўйнади ва 19-дақиқага келиб, жарима майдончаси ташқарисидан аниқ зарба билан ҳисобни очди.
Гол урганидан кейин ҳам 20 ёшли футболчимиз бир қатор хавфли ҳужумлар уюштириб, жамоадошлари учун қулай вазиятлар яратиб берди.
ЦСКА вакиллари танаффусга кетиш олдидан Келлвеннинг голи эвазига ҳисобдаги фарқни иккитага оширди.
Ўйиннинг кулминацион ва ҳал қилувчи палласи 50-дақиқага тўғри келди. Аббосбек Файзуллаев марказий ҳужумчи позициясига ўтди. Қанотдан узатилган тўпга легионеримиз ва рақиб ҳимоячиси Дарко Тодорович ташланди. Тўп дарвоза тўридан жой олди.
Бу вазият бир неча бор такроран кўрилганида ҳам тўпга ким тегинганини аниқлаб бўлмади. Кўпчилик Аббосни дубль билан табриклади. Учрашувдан кейин ўйин ҳақидаги фикр-мулоҳазалари билан ўртоқлашган Аббосбек Файзуллаев ўша вазиятга аниқлик қиритди.
- Учинчи гол урилган вазиятда мен тўпга текканим йўқ. Дарко Тодорович уни ўз дарвозасига киритиб қўйди. Мен мавсумдаги биринчи голимни узоқ кутгандим. Учинчи голдан кейин барибир бироз бўшашиб қолдик.
Яхшиямки, футбол бизни жазолагани йўқ ва “Ахмат” футболчилари эса гол ура олмади, - деди Аббосбек Файзуллаев.
Аббосбек Файзуллаев учрашувнинг энг яхши футболчиси, деб топилди. Аввалги мавсумда бир неча бор индивидуал совринлар соҳиби бўлган ҳамюртимиз янги чемпионатда биринчи маротаба расман учрашув қаҳрамони сифатида тақдирланди.
20 ёшли легионеримиз янги мавсумда Россия Премьер-лигаси ва мамлакат кубоги доирасида жами 11 та учрашувда иштирок этиб, ўз ҳисобига битта гол ва бешта ассист расмийлаштирди.
ЦСКА Премьер-лига доирасидаги навбатдаги учрашувини 6 октябрь куни “Динамо” жамоасига қарши ўтказади. Бу ўйинга рақиб мезбонлик қилади.
Унгача “армиячилар” Россия кубоги гуруҳ босқичи доирасида сафарда “Нижний Новгород” жамоаси билан куч синашади. Мазкур учрашув 1 октябрга белгиланган. “Замин” янгиликларини “Youtube”да кузатиб боринг
Ctrl
Enter
Хато топдИнгизми?
Иборани ажратиб Ctrl+Enter тугмасини босингМавзуга оид янгиликлар
Яқин Шарқ катта уруш остонасидами?
Столтенберг: “Россия НАТОни қўрқитишга ҳаракат қилмоқда”
Ҳиндистонда 50 дан ортиқ дори-дармонлар сифатида муаммо аниқланди
Дунёдаги энг бахтли шаҳарлар рейтинги эълон қилинди
Лукашенко НАТО давлатларига ядровий зарба беришга тайёрлигини маълум қилди
Зеленскийнинг АҚШга ташрифи: Трамп «Украина энди йўқлиги»ни айтди
Британия ташкилоти Ўзбекистонда гастрономик кўчаларни ташкил этиши мумкин
Амирнинг фожиали ўлими ёки салтанатни синдирган ёнғин
