Хайр “Реал”, алвидо “Сити”! Бошқа суперклуб Ҳусановни олиш йўлини топди...

Қишки трансферлар ойнаси билан “Ланс”да ўйнаётган Абдуқодир Ҳусанов учун кураш қизғин паллага кириб бормоқда. 20 ёшли марказий ҳимоячимизга Франция, Испания, Англия, Италия, Германия, Туркия каби мамлакатларнинг йигирмага яқин клублари қизиқиш билдираётган бўлса, кейинги кунларда Ҳусановнинг номини “Реал”, “Манчестер Сити”, “Пари Сен-Жермен” каби чемпион жамоалар билан бирга тилга олиш долзарб мавзуга айланди.

Айниқса, сўнгги паллада “Манчестер Сити” ўзбек футболчиси бўйича “Ланс” билан музокара бошлагани, курашга “Реал” қўшилгани жуда кўп муҳокама қилинмоқда.

Эътиборлиси шундаки, Ҳусановни ПСЖ Англия ва Испания чемпионларига бой бериб қўймоқчи эмас. Парижликлар Ҳусанов учун курашда устунликни ўзлари томонга оғдирадиган, "Ланс"га маъқул келиши кутилаётган ечимларни таклиф қила бошлади.

Франция футболини ёритиб келаётган нуфузли манбалардан бири – foot-sur7.fr портали Париж суперклубининг Абдуқодир Ҳусанов трансфери учун амалга ошираётган ишлари ҳақида асосли маълумотларни тақдим этди.

- Ўз ҳимоя чизиғи марказини ёш истеъдод эгаси ёрдамида мустаҳкамлашга қарор қилган ПСЖ қишки трансферлар ойнаси давомида Абдуқодир Ҳусанов трансфери бўйича “Ланс” билан келишувга эришишга бел боғлади.

Январда Милан Шкриньярнинг кетишини инобатга олган парижликлар шу ойнинг ўзида унинг ўрнини Ҳусанов билан тўлдиришга жиддий тарзда киришди.

Аслида ПСЖ бу позицияга Томас Араухони мўлжаллаган эди, бироқ “Бенфика” ўз ҳимоячисини 100 миллион еврога баҳолагани пойтахт клуби спорт директори Луиш Кампушни бошқа ечим топишга мажбур қилди.

Буни инобатга олган Кампуш Ҳусанов номзодида тўхтади. 20 ёшли ўзбек футболчиси 2023 йили “Ланс”га келганидан бери Лига 1 ўйинларида ўзини кўрсатмоқда. Франк Хейз қўл остида “Ланс”нинг асосий таркибидан ўрин олган ҳимоячи Уилл Стилл даврида жамоа етакчисига айланди ва айни пайтда Франциядаги энг кучли беш ҳимоячидан бири ҳисобланади.

ПСЖ Ҳусановни қўлга киритиш учун ички чемпионатда “Марсель”, Европа миқёсида – “Атлетико Мадрид”, “Манчестер Сити”, “Ньюкасл Юнайтед” каби бир неча гранд клублар билан рақобатлашишига тўғри келмоқда. Энди испан матбуоти, хусусан Fichajes нашри Абдуқодирга “Реал” ҳам даъвогарлик қила бошлагани ҳақида бонг урмоқда.

Бу ҳолатда “Ланс” ўзи учун энг манфаатли ва қулай таклифни қабул қилади. “Пари Сен-Жермен” бу борада бошқа номзодлардан устунликка эга.

“Ланс” дарвозабони Брис Самба бошқа клубга ўтишга қарор қилган. ПСЖ унинг ўрнига яхши савиядаги дарвозабон қидираётган “Ланс”га Абдуқодир Ҳусанов трансфери доирасида учинчи голкипери Арнау Тенасни олишни таклиф қилмоқда.

Луиш Кампуш истеъдодли испан посбонини бериш орқали “Ланс” раҳбариятини ўзбек футболчисини айнан Парижга жўнатишга кўндиришни мақсад қилган. Демак, Абдуқодир Ҳусанов атрофидаги вазият қизғин паллага кирган ва “Ланс” қандай ечимни қабул қилишини тез орада билиб оламиз, - деб ёзмоқда foot-sur7.fr портали.

Transfermarkt портали Абдуқодир Ҳусановни 12 миллион еврога баҳоламоқда. Бироқ бу сумма “Ланс”ни қониқтирмайди. Франция клуби ўз кашфиёти учун 20-30 миллион евро атрофида бадал пули талаб қилиши айтилмоқда. «Замин» янгиликларини «Вконтакти»да кузатиб боринг