"Манчестер Сити" футболчиси Абдуқодир Хусановнинг агенти Ғайрат Ҳасбиуллин ўзининг ватандоши ва Ўзбекистон терма жамоаси ҳамкасби Аббосбек Файзуллаевнинг Европага чиқиш истиқболлари ҳақида фикр билдирди.
"Менимча, Аббосга қизиқиш бор, бу шубҳасиз. Савол шундаки, ЦСКА, Аббоснинг агентлари ва у ўзи қачон Европа чемпионатига ўтишга қарор қилади. У Ўзбекистон терма жамоасининг лидерларидан бири, ва менимча, Европа скаутлари ва клублари унга қизиқиш билдириши керак. Агар у ЦСКАда яхши ўйин кўрсатаётган бўлса, Европада ҳам муваффақият қозона олади," — дея таъкидлади Ҳасбиуллин ODDS.ru нашрига берган интервьюсида.
Аббосбек Файзуллаев 2023-йил август ойида "Пахтакор"дан ЦСКАга 500 минг еврога ўтганди. Жорий мавсумда ярим ҳимоячи 23 ўйинда майдонга тушиб, 3 та гол урди ва 6 та голли узатма берди.
Transfermarkt портали маълумотига кўра, 21 ёшли футболчининг ҳозирги бозор қиймати 8 миллион еврони ташкил қилади. Унинг ЦСКА билан шартномаси 2026-йилнинг июнига қадар амал қилади.
Ўтган йили Файзуллаев Осиёнинг энг яхши ёш футболчиси деб топилган эди.
“Замин” янгиликларини “Telegram”да кузатиб боринг
