Раньери ўйини ўзгарган Элдор Шомуродов ҳақида нималар деди?

Клаудио Раньери ўзбек ҳужумчиси Элдор Шомуродовни кетма-кет икки ўйинда бошланғич таркибда майдонга туширди.

Рақиблар ҳам Италиянинг энг кучли жамоалари – “Наполи” ва “Милан” эди. А Серия доирасида “Наполи”га қарши жуда ишончли ўйнаган ўзбек футболчиси жамоасининг дуранг қайд этишига муносиб ҳисса қўшганди.

Италия кубогида “Милан”га қарши биринчи бўлимда тўлиқ ўйнаган Элдор Шомуродов рақиб ҳимоясини ёриб ўтолмади. Шунга қарамай, ҳамюртимиз анча фаол ўйнади.

Клаудио Раньери шогирдлари мезбонларга 1:3 ҳисобида ютқазиб, мусобақадаги юришини тўхтатишга мажбур бўлди.

“Рома” расмий сайти Клаудио Раньерининг учрашув ҳақидаги фикр-мулоҳазаларини эълон қилди.

- Энг аввало, биз “Милан”нинг жуда зўр ўйнаганини ва ҳар томонлама устунлик қилганини эътироф этишимиз ва мақташимиз керак. Буюк клуб билан ўйнадик. Учрашувда ижобий ҳисоб қайд этиш учун қўлимиздан келганини қилдик, беллашув давомида гол уриш учун бир неча марта имкониятимиз бўлди, ҳимояда ҳам яхши ўйнай олган вазиятларимиз ҳам бор эди.

Биз гол уришимиз керак бўлган паллаларда ўзимиз тўп ўтказиб юбордик. Кучли босим ўтказилган пайтда ўйин тизгини қўлдан чиқиши табиий ҳол ва шу туфайли ҳам бурилиш ясай олмадик.

Мени қарши ҳужумларга таянмасликда айблашади, бироқ бунақа юқори даражадаги жамоага қарши ўйнаганда, бу ишни амалда уддалаш оғизда гапиришдан анча қийин.

Биздан мусобақа жадвалида кўтарилишни, Италия кубогини ютишни, Европа лигасига чиқишни талаб қилишаётгани мени хурсанд қилади. Лекин жамоани қай аҳволда қабул қилиб олганимни ҳам унутманг.

Менга қизиғи, шогирдларим бу мағлубиятга қандай муносабатда бўлишидир. Биз бу мавсум ҳеч бўлмаганда, еврокубокларга чиқишни уддалашимиз керак. Бунинг учун қўлимиздан келаётганини қилаётганимизни тушунишингизни истардим.

Футболчиларга ҳам осон эмас. Улар бир мавсумнинг ўзида учинчи мураббий билан ишлаяпти. Ҳар бир мураббийнинг ўз қараши, ўз ишлаш услуби бор. Бу осон эмас. Мен шогирдларим қўлидан келганини қилаётгани учун улардан миннатдор бўлишим керак.

Бу учрашувдан кейин “Милан” бош мураббийи Сержиу Консейсауга жамоада тартиб ўрната олганини айтдим. Жамоаси яхши ўйнаётганини мақташ керак. Мен самимиятни қадрлайман ва нимани ҳис қилсам шуни айтаман. Рақиблар билан ўзаро ҳурмат борасида муаммо йўқ.

Шу ўринда айтишим керакки, беллашувдан олдин Элдор Шомуродовдан “Наполи”га қарши учрашувда қандай ўйнаган бўлса, бу гал ҳам шундай ҳаракат қилишини сўрадим. Элдор Пауло Дибала билан уч нафар ярим ҳимоячимиз олдида ўйнаб, ўйин жараёнини бошқариб бориши талаб этилган эди. Улар жамоани оёққа турғазиши керак эди.

Лекин Шомуродов айнан “Наполи”га қарши кечган учрашувда жуда кўп куч сарфлаб юборган эди. Шу боис, бу гал худди “Наполи” билан бўлган ўйиндагидек ҳаракатларини тўлиқ амалга ошира олмади. Шундай бўлса-да, жуда яхши ўйин ўтказганини эътироф этиш лозим.

Мен уни айбласам, адолатдан бўлмайди, чунки Элдор зарба йўллади, жарима майдончаси атрофида шерикларига жуда яхши узатмаларни амалга оширди. Биз курашдик.

“Милан” тезкор ҳужумлар уюштиришини билардик. Тезкор ҳужумга таянадиган “Айнтрахт” ва “Наполи”га қарши тартибли ўйин намойиш қилгандик. Лекин “Милан”га қарши туришни уддалай олмадик, айрим вазиятларда ишончли ўйнай олдик, - деди Клаудио Раньери. “Замин” янгиликларини “Telegram”да кузатиб боринг