Анчелотти: "Гвардиолага қарши ўйинларга тайёрланиш – даҳшат, чунки у доим ҳайратлантиради"

"Реал Мадрид" бош мураббийи Карло Анчелотти Чемпионлар Лигаси 1/8 финал босқичи доирасида "Манчестер Сити"га қарши бўлиб ўтадиган ўйиндан аввал Пеп Гвардиола ҳақида ўз фикрларини билдирди. Итальян мутахассиси испаниялик мураббийни замонавий футболга инқилобий ўзгаришлар олиб кирган инсонлардан бири деб ҳисоблашини таъкидлади.

"Пеп – замонавий футболга улкан ҳисса қўшган мураббийлардан бири. У нафақат тактик жиҳатдан ўзига хос ёндашувларга эга, балки жамоасига доим янги ғоялар ва услублар олиб киради. Мен уни жуда ҳурмат қиламан. Агар у дунёнинг энг яхши мураббийи бўлмаса ҳам, шубҳасиз, энг яхшиларидан бири. Унга қарши ўйнаш ва беллашувларга тайёрланиш ҳар доим катта қийинчилик туғдиради, чунки у сиз кутмаган тактик ечимлар билан сизга сюрприз қилиши мумкин. Унга қарши ўйинларда ҳеч қачон олдиндан натижани башорат қилиш мумкин эмас. Шунинг учун бу ҳақиқий синов бўлади." – деди Анчелотти.

Ҳал қилувчи тўқнашувлар яқинлашмоқда

Европа футболидаги энг катта қарама-қаршиликлардан бири ҳисобланган "Реал Мадрид" ва "Манчестер Сити" ўртасидаги биринчи ўйин бугун тунда Англияда, "Этихад" стадионида бўлиб ўтади. Жамоалар ўртасидаги жавоб баҳси эса 19 февраль куни Испания пойтахти Мадриддаги "Сантьяго Бернабеу"да ўтказилади.

Бу икки клуб ўтган мавсумларда ҳам Чемпионлар Лигасида жами 14 марта тўқнаш келган бўлиб, "Манчестер Сити" умумий ҳисобда 5 марта ғалаба қозонган, "Реал"нинг ғалабаси 4 та, 5 ўйин дуранг натижа билан якунланган.

Олдимизда турган ўйин нафақат икки кучли клуб ўртасидаги жанг, балки дунёдаги энг яхши икки мураббийнинг маҳорат синови ҳам бўлади. Футбол мухлислари тактик курашга бой ва жонли ўйинни кутмоқда. «Замин»ни Telegram’да ўқинг!