“Тоттенхэм” клуби 28 ёшли немис ҳужумчиси Тимо Вернер билан узоқ муддатли шартнома имзоламасликка қарор қилди. Жамоа раҳбарияти тажрибали футболчини сотиб олиш имкониятига эга эди, аммо бу вариантдан фойдаланмади. Энди Вернер мавсум якунланганидан сўнг “РБ Лейпциг”га қайтиб боради.
Нега “Тоттенхэм” Вернердан воз кечди?
Вернер 2024 йилнинг қишида “Тоттенхэм” сафига ярим мавсумлик ижара асосида қўшилган эди. Кейинчалик бу муддат яна бир йилга узайтирилиши мумкинлиги айтилган, аммо ҳужумчининг ўйини клубнинг катта ишончини қозона олмади.
Немис форварди “Тоттенхэм” сафида 27 та ўйин ўтказиб, атиги битта гол урди. Бу эса ҳужумчи учун жуда ночор натижа ҳисобланади. Энг муҳими, Тимо Вернер жиддий ўйинларда ўзини кўрсата олмади. Хусусан, “Манчестер Сити”га қарши учрашувда у сўнгги дақиқаларда майдонга тушган ва Абдуқодир Ҳусанов етакчилигидаги ҳимоя чизиғини ёриб ўта олмаган эди.
Жамоа бош мураббийи Анге Постекоглу Вернернинг ўйинидан қониқмаган ҳолда уни танқид қилишдан тўхтамади ва футболчига ишонч билдиришни бас қилди. Шу сабабли “Тоттенхэм” Вернерни 8,5 миллион фунт эвазига сотиб олиш имкониятидан воз кечди.
Вернер қаерга кетади?
“РБ Лейпциг” эса, Вернерни жамоада олиб қолиш ниятида эмас. Клуб футболчининг фаолияти пасайиб кетаётганини инобатга олган ҳолда, уни тўлиқ сотишни режалаштирмоқда.
Сўнгги маълумотларга кўра, Вернернинг кейинги манзили АҚШ бўлиши мумкин. Германиялик ҳужумчига “Нью-Йорк Ред Буллз” жамоасидан таклиф бор ва катта эҳтимол билан ёзда у ушбу клуб сафига ўтади.
Тимо Вернер Европа футболида ўзини кўрсатиш учун яна бир имкониятга эга бўладими ёки у энди фаолиятини АҚШда давом эттиради – бу савол ҳали очиқ қолмоқда. Аммо “Тоттенхэм” учун у ишончни оқлай олмаган футболчи сифатида тарихда қолди. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
