Абдуқодир Ҳусанов – “Манчестер Сити”нинг февраль ойидаги энг яхши футболчиси!

Англиянинг етакчи клубларидан бири "Манчестер Сити" расмий сайтида февраль ойининг энг яхши футболчисини аниқлаш бўйича овоз бериш ташкил этди. Кучли учликка жамоанинг асосий юлдузлари – Эрлинг Ҳоланд, Абдуқодир Ҳусанов ва Йошко Гвардиол киритилди.

Овоз бериш натижаларига кўра, ўзбек ҳимоячиси Абдуқодир Ҳусанов мухлислар томонидан “Ман Сити”нинг ой футболчиси деб топилди!

Ҳусанов таниқли юлдузларни ортда қолдирди

Овоз беришда жамоанинг етакчи ҳужумчиси, Эрлинг Ҳоланд ва Хорватия миллий жамоаси ҳимоячиси Йошко Гвардиол ҳам қатнашди. Бироқ, Ҳусановнинг майдондаги таъсирчан ўйини ва юқори самарадорлиги унга мухлислар томонидан катта ишонч қозониш имконини берди.

Футболчиларнинг февраль ойидаги натижалари:
1. Эрлинг Ҳоланд – 5 ўйин, 4 та гол, 1 та голли узатма
2. Абдуқодир Ҳусанов – 5 ўйин, 1 та гол
3. Йошко Гвардиол – 6 ўйин, 1 та ассист

Абдуқодир Ҳусанов жамоадаги энг муваффақиятли ҳимоячилардан бири сифатида намоён бўлмоқда. Унинг ўйини нафақат Хосеп Гвардиола, балки клуб ишқибозлари томонидан ҳам юқори баҳоланди.

Ўзбек футболи учун улкан тарихий натижа

Бу ғалаба ўзбек футболи учун жуда катта аҳамиятга эга. Абдуқодир Ҳусанов каби футболчининг дунёнинг энг кучли клубларидан бири – "Манчестер Сити" сафида ойнинг энг яхши футболчиси бўлиши, юртимиз футболчилари учун катта намуна бўлиб хизмат қилади.

Ҳусановнинг бундай муваффақиятга эришиши унинг катта истеъдод эгаси экани ва меҳнатсеварлигини яна бир бор тасдиқлайди.

Абдуқодир Ҳусанов бугунги кунда жаҳон футболида тобора машҳур бўлиб бораётган ўзбек футболчиларидан бири. Унинг "Ман Сити" каби топ-жамоадаги шиддатли ўсиши унинг келажакдаги фаолиятида ҳам катта муваффақиятларга эришишини англатади.

Футбол мухлислари энди Абдуқодир Ҳусановнинг жамоаси билан чемпионлик ва янги муваффақиятларга эришишини орзиқиб кутмоқда. "Ман Сити" ва ўзбек футболи тарихида янги юлдуз порламоқда! “Замин” янгиликларини “Telegram”да кузатиб боринг