Гвардиола Ҳусанов автогол урган учрашувдан кейин нималар деди?

Англия Премьер-лигасининг 29-турида келаси мавсум учун Европа Чемпионлар лигаси йўлланмасини берадиган ўринлар учун курашаётган икки жамоа – “Манчестер Сити” ва “Брайтон” ўзаро куч .

“Этихад” аренасидаги учрашувда мезбонлар икки марта ҳисобда олдинга чиқиб олди. Аввалига 11-дақиқада Умар Мармуш ишлаган пенальтини Эрлинг Холанд аниқ бажарди.

Бу гол Эрлинг Холанд номини Англия Премьер-лигаси тарихига ёзди. Норвегиялик чарм тўп устаси мусобақа тарихида 100 та самарали ҳаракатни энг тез амалга оширган ўйинчи сифатида рекорд ўрнатди. Холанд Англия Премьер-лигасида гол+пас тизими бўйича 100 баллни юзтадан кам учрашувда тўплаган биринчи ва ҳозирча ягона футболчига айланди. 24 ёшли форвард бу натижага эришиши учун 94 та учрашув кифоя қилди.

“Брайтон” футболчилари Манчестердан қуруқ қайтгани йўқ. Дастлаб, Холанднинг голига Эступиньян ўн дақиқа ичида жавоб берди. Унинг жаримадан йўллаган зарбаси устунга тегиб, дарвоза тўридан жой олди.

Мезбонларни биринчи бўлимнинг ўзида Умар Мармуш ҳисобда олдинга олиб чиққан бўлса, “Брайтон”нинг сафардан очко олиб қайтишига Абдуқодир Ҳусанов кўмаклашиб юборди. Ҳамюртимиз ўйиннинг 48-дақиқасида рақиб йўллаган зарбани қайтаришга чоғланган легионеримиз тўпни ўз дарвозасига киритиб қўйди – 2:2.

Ушбу автогол Хосеп Гвардиолага антирекорд олиб келди. Бу “Манчестер Сити” жорий мавсумда ўтказган 40-гол бўлди. Хосеп Гвардиола “шаҳарликлар”ни 2016 йилдан бери бошқараётган бўлса, жамоа ҳали бирорта мавсумда ўз дарвозасидан бунча кўп тўп олиб чиқмаган. Фақатгина испаниялик мутахассис шогирдлари унинг дебют мавсуми – 2016-2017 йилги чемпионатда 39 та гол ўтказган эди.

Учрашувдан кейин Хосеп Гвардиола ўз фикрлари билан ўртоқлашди. Ўз дарвозасига тўп киритиб қўйган Абдуқодир Ҳусановни маломат қилгани йўқ, аксинча ўзбек легионерининг ўйинини мақстади.

- Яхши ўйин бўлди, учрашув катта босим остида ўтди. Биз ҳозир қилаётган ишлар жуда қийинчилик билан бўлаётганини жуда яхши биламан.

Ўйинчилар майдонда борини берди, биз бир очкога эга бўлдик ва курашни давом эттирамиз. Албатта, ишончим бор. Ҳар доим шундай бўлган.

Ёш футболчилар яхши ўйнади, айниқса, ҳимоячиларимиз ақл билан ҳаракат қилди. Рубен Диаш ва Абдуқодир Ҳусанов фантастик даражада ўйнади. "Ноттингем Форест" билан бўлган ўйинга қараганда бу гал анча яхши тўп тепдик, иккита гол урдик ва яна дарвозани ишғол қилиш учун вазиятлар яратдик.

Биз ғалабага яқин эдик, лекин унга эриша олмадик, - деди Хосеп Гвардиола.

WhoScored статистика портали учрашувда футболчиларнинг ҳаракатларини таҳлил қилиб, уларни баҳолади. “Манчестер Сити” ўйинчиларидан энг кам кўрсаткич – 6 балл Абдуқодир Ҳусанов, Рубьен Диаш ва Фил Фоденга берилди. Жамоанинг иккита голига катта ҳисса қўшган Умар Мармушнинг ўйини 8,1 баллга лойиқ кўрилди.

“Манчестер Сити” навбатдаги учрашувини 30 март куни Англия кубоги доирасида “Борнмут” жамоасига қарши ўтказади. “Замин” янгиликларини “Telegram”да кузатиб боринг