Тимур Кападзе: "Ғалабага яқин эдик, лекин дуранг ҳам адолатли бўлди"

Хабарингиз бор, Ўзбекистон миллий терма жамоамиз Жаҳон чемпионати саралаш гуруҳ босқичиининг 8-турида Эрон билан куч синашиб, 2:2 ҳисобида жанговар дурангга имзо чекди. Мазкур беллашувдан сўнг терма жамоамиз бош мураббийи Тимур Кападзе матбуот анжуманида иштирок этиб, ўйин ҳақида ўз фикрлари билан ўртоқлашди.

"Авваламбор, Эрон терма жамоасини Жаҳон чемпионатига йўл олганликлари билан табриклайман. Шу билан бирга, омад тилаб қоламан.

Агарда ўйин ҳақида гапирадиган бўлсам учрашув ёмон бўлмади. Икки жамоа ҳам яхши тайёргарлик кўрди. Бизда ҳам форсларда ҳам яхши имкониятлар бўлди. Албатта, ғалаба қозонишимиз ҳам мумкин эди, лекин дуранг ҳам адолатли бўлди.

Шу сабабли, биз энди бўлажак беллашувларга тайёргарлик кўрамиз. Бундан ташқари, йигитларга ҳам раҳмат айтмоқчиман. Сабаби, уларнинг барчаси бўлиб ўтган учрашувда яхши ҳаракат қилишди. Албатта, бизни қўллаб-қувватлаш учун стадионга ташриф буюрган мухлисларимизга ва халқимизга раҳмат айтаман.

Эсимда бор, терма жамоага вақтинчалик мураббий бўлиб, Эронга қарши ўртоқлик баҳсида иштирок этганмиз. Ўшанда рақиб жамоа Жаҳон чемпионатига тайёргарлик кўраётган пайти бўлган эди. Гарчи 1:0 ҳисобида имкониятни бой берган бўлсак ҳам, у учрашувда икки жамоа учун ҳам фойдали бўлган эди. Албатта, у пайт билан ҳозирги даврни солиштирмаган бўлар эдим, чунки икки жамоа таркибида ҳам ўзгаришлар катта бўлди.

Шу билан бирга, сўнгги йилларда президентимиз футболни ривожлантириш учун катта ҳисса қўшмоқдалар. Ёшлар футболини ҳам юксакларга олиб чиқиш учун бир неча ишлар олиб борилмоқда. Шунинг учун бу ишлар ҳам ўз мевасини бермоқда, Ин Шаа Аллоҳ мен ишонаман биз янада кучли жамоа бўла оламиз. Келажак учун ёш истеъдодли ўйинчилар ҳам етишиб чиқмоқда.

Ўйиндан аввал Эрон терма жамоасини батафсил ўрганиб чиқиб, уларнинг нозик томонларини таҳлил қилиб, футболчиларга етарлича кўрсатмалар бердик. Шу сабабли, бугунги беллашувда баъзи жойларда ғалаба учун жуда яқин ҳам келдик.

3 та муҳим ўйинчимиз йўқлиги ҳам бироз сезилгандек. Албатта, улар билан жамоамиз янада қудратлироқ бўлар эди, лекин бу терма жамоа ўйлайманки, уларнинг ўрнига майдонга тушган футболчилар ҳам яхши ҳаракат қилишди.

Эрон чемпионати ҳам кучли эканлигини билар эдик, сабаби, терма жамоа сафида ҳаракат қилаётганимда ҳам тўқнаш келганмиз", - дея таъриф бериб ўтди Тимур Кападзе. “Замин” янгиликларини “Telegram”да кузатиб боринг