Карло Анчелотти “Реал”дан кетадими? Мадридда жиддий ўзгаришлар бошланмоқда

Мадриднинг “Реал” клуби Чемпионлар лигаси чорак финалида “Арсенал”га икки учрашувда ҳам мағлуб бўлиб (0:3 ва 1:2), 2020 йилдан буён илк бор ярим финалга чиқа олмади. Ушбу мағлубиятдан сўнг жамоада жиддий ўзгаришлар кутилаётгани, хусусан бош мураббий Карло Анчелоттининг лавозимидан бўшаши эҳтимоли ошгани хабар қилинмоқда.

Фабрицио Романо каби машҳур инсайдерлар “Арсенал” билан дастлабки ўйиндан кейин Анчелоттининг истеъфога чиқиш эҳтимоли ҳақида хабар берган эди. Sky Sports маълумотига кўра, италиялик мутахассис 26 апрель куни бўлиб ўтадиган Испания кубоги финалидан кейин ишдан бўшатилиши мумкин. Ушбу ўйинда “Реал”нинг рақиби “Барселона” бўлади.

Ҳозирда мадридликлар Испания чемпионатида иккинчи ўринда бўлиб, “Барселона”дан 4 очко ортда қолмоқда. Анчелоттининг ўзи эса вазият бўйича шундай изоҳ берди:

“Мен ҳар қандай вақтда клубдан кетишим мумкин. Бу қарор раҳбариятнинг қўлида. Ҳозир ёки мавсум охирида бўлиши мумкин. “Реал” билан ишим якунланганда доим миннатдор бўламан”, деди у.

Жамоа президенти Флорентино Перес ҳам футболчиларнинг Анчелоттига бўлган ишончини йўқотаётганидан хабардор. Relevo нашрининг хабар беришича, етакчи футболчилардан айримлари Анчелоттининг “Арсенал”га қарши ўйин учун танлаган тактикасига қарши чиққан ва бу ҳақда президентга ҳам маълум қилинган.

Анчелоттининг ўрнига асосий номзод сифатида “Байер”ни бошқараётган Ҳаби Алонсо кўрилмоқда. Алонсо ўтган мавсумда “Байер”ни чемпионлик ва кубок ғолиблигига олиб чиққан эди. Шунингдек, германиялик машҳур мураббий Юрген Клоппнинг номи ҳам “Реал” билан боғланмоқда. Клопп ўтган мавсум якунида “Ливерпул”ни тарк этган ва ҳозирда Red Bull концернида ишламоқда. Аммо мураббийлик фаолиятига қайтишни режалаштираётгани айтилмоқда.

“Албатта, Ҳаби Алонсо ва Юрген Клопп каби кўплаб номлар тилга олинмоқда. Лекин умид қиламанки, президент Анчелоттини қолдиришга қарор қилади. “Реал”да ишлаш ҳар қандай мураббий учун қийин вазифа”, деди “Реал”нинг собиқ президенти Рамон Калдерон.

Мадридликлар навбатдаги учрашувини 20 апрель куни Ла Лиганинг 32-турида “Атлетик”ка қарши ўтказади. Жамоа сўнгги беш ўйинда фақат битта ғалаба қозонган.

Сиз нима деб ўйлайсиз: Анчелотти қолиши керакми ёки “Реал”га янги бош мураббий керакми? «Замин»ни Telegram’да ўқинг!