Ханс-Дитер Флик: «Анчелотти билан боғлиқ вазиятни кузатиш мен учун ҳам ёқимсиз»

Испания Ла Лигасида биринчи ўринни эгаллаб турган «Барселона» клубининг бош мураббийи Ханс-Дитер Флик асосий рақиби бўлган «Реал» бош устози Карло Анчелотти атрофида рўй бераётган ҳолатларга ўз муносабатини билдирди.

Маълум бўлишича, «Қироллик клуби» раҳбарияти томонидан италиялик машҳур мураббий Карло Анчелоттини истеъфога чиқариш эҳтимоли тобора кучайиб бормоқда.

— Карло Анчелотти билан содир бўлаётган воқеаларни кузатиб бориш мен учун ҳам ёқимсиз. У «Реал» билан мумкин бўлган барча совринларни қўлга киритган, жуда тажрибали мутахассисдир. Мен унинг шахсияти ва профессионаллигига юксак ҳурмат билан қарайман, — деб таъкидлади каталонияликларнинг немис мураббийи журналистлар билан бўлган суҳбатида.

Эслатиб ўтиш жоизки, 65 ёшли Анчелотти «Реал» бошқарувига 2021 йилда қайтган эди. Ўтган мавсумда унинг қўл остида «қироллик клуби» Испания чемпионати ҳамда Европа Чемпионлар лигасида зафар қучган. Аммо амалдаги шартномаси 2026 йил ёзигача тузилган бўлса-да, клуб раҳбарияти унинг жорий мавсумдаги натижаларидан норози бўлиб турибди.

Мадрид клубидаги раҳбарлик Анчелоттининг ишидан қониқмаётгани сабабли, уни истеъфога чиқариш масаласи кун тартибидаги асосий мавзулардан бирига айланган. Бу эса нафақат «Реал» мухлислари, балки бутун Европа футболи учун ҳам катта қизиқиш уйғотган масалага айланиб улгурди.

Ҳозирча италиялик мутахассиснинг кейинги тақдири қандай ҳал қилиниши ноаниқлигича қолмоқда. Аммо рақиб жамоанинг бош мураббийи бўлишига қарамасдан, Фликнинг Анчелотти ҳақидаги фикрлари унинг профессионал мутахассис сифатидаги юқори мавқеига яна бир бор далил бўлди. Бу ҳолат ҳам мухлислар, ҳам футбол экспертлари томонидан алоҳида эътибор билан кузатилмоқда. «Замин»ни Telegram’да ўқинг!