Тебас "Реал" президенти Пересни кескин танқид қилди: "У футбол эмас, ҳокимият учун ўйнаяпти"

Испания ЛаЛигаси раҳбари Хавьер Тебас сўнгги воқеалардан кейин ўзининг ижтимоий тармоқдаги саҳифасида мадридликларнинг президенти Флорентино Переснинг ҳаракатларини кескин танқид қилди. ЛаЛига раҳбари ўз постида Переснинг футболни эмас, ўзининг шахсий ҳокимиятини кучайтиришни кўзлаётганини айтиб ўтди.

Хавьер Тебас, ўзининг постида шундай ёзади: "Бу ерда гап футбол ҳақида эмас, гап ҳокимият ҳақида бормоқда. Тебас Пересга ёқмайди, чунки Хавьер унинг буйруқларини бажаришни хоҳламайди. УEФА раҳбари Александр Чеферин ҳам Пересга ёқмайди, сабаби у ҳам Флорентинонинг айтганларини қилмайди. Рафаэль Лоузан (Испания футбол федерацияси президенти) Переснинг айтганларига югуриб кетмаётгани учун унга ҳам қарши чиқяпти".

ЛаЛига раҳбарининг таъкидлашича, Переснинг босими туфайли ҳаттоки шарҳловчилар ҳам ўз ишини мустақил бажаришга қийналмоқда. Унинг фикрича, мадридликларнинг президенти ҳакамлик тизимидаги ислоҳотлардан ҳам норози, чунки бу ислоҳотлар унинг шахсий манфаатларига мос келмаяпти.

"Real Madrid TV" орқали ҳакамларга қарши мунтазам ва босимли видеоларнинг эълон қилиниши ҳакамларнинг руҳий ҳолатига салбий таъсир қилган ва уларнинг ишига тўсқинлик қилмоқда, деб ҳисоблайди Тебас.

Унинг қўшимча қилишича, "Реал Мадрид" сўнгги воқеалар сабабли Испания Кубогининг финали олдидан бўлиб ўтиши керак бўлган барча расмий тадбирларни бекор қилди. Жумладан, матбуот анжумани, машғулотлар ва бошқа тадбирлар бекор қилинган. Ҳатто, "Реал"нинг финалда иштирок этмаслиги ҳам мумкинлиги ҳақида хабарлар тарқалган.

Тебас ўз постида Переснинг фаолиятига яна шундай таъриф берди: "У жуда нозик характерли инсонга ўхшайди. У норозилик эмас, босим ўтказади. Шикоят қилмайди, таҳдид қилади. У баҳслашиш эмас, жазолаш билан шуғулланади. У футболни яхшилашни эмас, ўзининг шахсий футболи яхши бўлишини хоҳлайди. Энг даҳшатлиси эса бу эмас, балки жамиятда кўпчиликнинг унга йўл очиб бераётгани, унинг ҳаракатларини қўллаб-қувватлаётгани ва бу ишларда унга ёрдам беришидир", деб ёзади ЛаЛига президенти.

Тебаснинг мазкур баёноти жамоатчилик ва футбол жамоатчилиги орасида катта муҳокамаларга сабаб бўлмоқда. «Замин»ни Telegram’да ўқинг!