Бектемир Мелиқўзиев чемпионлик камари учун ҳал қилувчи жангга чиқади

Ўзбекистонлик истеъдодли боксчи Бектемир Мелиқўзиев чемпионлик камари учун асосий қадамлардан бири бўлган муҳим беллашувда рингга чиқади. Бу ҳақда Ўзбекистон профессионал бокс федерацияси матбуот хизмати хабар берди.

Маълум қилинишича, Бектемир 30 май куни ўзининг ҳамкори бўлган таниқли "Golden Boy Promotions" томонидан АҚШнинг Лас-Вегас шаҳрида ўтказиладиган катта профессионал бокс кечаси доирасида навбатдаги жангини ўтказади.

29 ёшли Бектемирга бу гал америкалик истеъдодли чарм қўлқоп устаси Дарьюс Фулгхэм рақиблик қилади. Беллашув супер ўрта вазн тоифасида бўлиб ўтади ва WBA ташкилотининг чемпионлик камари учун асосий даъвогарни аниқлаш (Элиминатор) мақомига эга бўлади.

Айни пайтда Мелиқўзиев WBA рейтингида учинчи поғонада бормоқда. Унинг рақиби Фулгхэм эса тўртинчи ўринни эгаллаб турибди. Бу жанг ғолиби бевосита чемпионлик камари учун курашиш имкониятига эга бўлади.

Эслатиб ўтамиз, Бектемир шу кунга қадар профессионал фаолияти давомида 16 маротаба рингга кўтарилган. У ушбу жангларда 15 марта ғалаба қозониб (улардан 10 таси нокаут билан), фақат бир марта мағлуб бўлган.

Унинг рақиби Дарьюс Фулгхэм эса проф фаолиятида ҳозиргача ўтказган 14 та жангининг барчасида ғалаба қозонган бўлиб, улардан 12 тасида рақибларини нокаутга учратган.

Ушбу жанг нафақат икки кучли боксчи ўртасидаги тўқнашув сифатида, балки Мелиқўзиев учун чемпионлик камарига олиб борувчи муҳим босқич бўлиши билан ҳам алоҳида аҳамият касб этади. Шунинг учун бу беллашув бокс мухлислари томонидан катта қизиқиш билан кутиб олинмоқда. «Замин»ни Telegram’да ўқинг!