Анчелоттининг "Реал"даги келажаги сўроқ остида. У Бразилия термасини қабул қиладими?

Испания кубоги финалида "Реал Мадрид"нинг ашаддий рақиби "Барселона"дан учралган аламли мағлубияти (2:3) бош мураббий Карло Анчелоттининг клубдаги келажагига нисбатан турли саволларни келтириб чиқармоқда.

Маълум бўлишича, 65 ёшли италиялик машҳур мутахассиснинг ўзи ҳам Мадриддаги тақдирига нисбатан анча ишончсиз ҳолатга тушиб қолган ва жамоа раҳбариятининг якуний қарори қандай бўлишини кутмоқда. Бу ҳақда машҳур журналист Сезар Луис Мерло ўзининг инсайдер маълумотларига таяниб хабар берди.

Бироқ, Анчелотти ҳатто "Реал"ни тарк этган тақдирда ҳам ишсиз қолмайди, чунки унинг хизматларига бошқа жамоалар катта қизиқиш билдиришмоқда. Жумладан, Бразилия футбол конфедерацияси италиялик мутахассис билан музокараларда жиддий ижобий натижаларга эришгани ҳақида хабар тарқалган.

Бразилияликлар Анчелоттига ўз терма жамоасини қабул қилиб олишни таклиф қилишган. Ушбу таклифда, агар Анчелотти розилик берса, терма жамоани 2030 йилдаги жаҳон чемпионатига қадар бошқариши кўзда тутилган. Бу билан бирга, агар машҳур мутахассис бу таклифни қабул қилса, миллий терма жамоалар ўртасида энг юқори маош оладиган мураббийга айланиши ҳам мумкинлиги айтилмоқда.

Эслатиб ўтамиз, Карло Анчелотти 2021 йилдан бери "Реал Мадрид"да фаолият юритиб, бу давр мобайнида жамоа билан Чемпионлар лигаси, Ла Лига, клублар ўртасидаги жаҳон чемпионати ва бошқа бир қатор совринларни қўлга киритган эди. Энди эса унинг келажаги қандай бўлиши кўпчилик учун қизиқ саволга айланган.

Тез орада Анчелоттининг якуний қарори ва у билан боғлиқ янгиликлар кенг жамоатчиликка эълон қилиниши кутилмоқда. «Замин»ни Telegram’да ўқинг!